Un estudio realisa pa Universidad di Michigan a desafia e suposicion tradicional:
Zundramento ta stimacion?
Segun e estudio, e hombernan cu e casanan zundrado, ta mas sano. Ta den un matrimonio asina por retrasa e desaroyo di diabetes y promove un tratamento exitoso. Pasobra e muhenan zundrado ta regula e comportacion di nan casa relaciona cu nan salud, specialmente si nan tin problema cu diabetes. Pa yega na e conclusion aki, e investigadornan a analisa e resultado di encuesta di 1228 pareha casa durante 5 aña. Na comienso di e estudio, e boluntarionan tabatin entre 57-85 aña y 389 di nan tabatin diabetes na final di e investigacion. Asina nan a investiga e rol cu e calidad di relacion tin cu e riesgo di contrae diabetes y a haya algun diferencia hopi grandi.
E descubrimento mas sorprendente tabata cu, pa e hombernan, e aumento den calidad negativo di matrimonio ta baha e riesgo di desaroya diabetes y ta aumenta e chensnan di trata e enfermedad, unabes cu e yega. Diabetes ta rekeri e controlnan constante y e muhenan ta zundra nan casa, pa nan somete na nan, loke ta haci cu tabatin tension den pareha, pero ta mehora e salud di e hombernan.
Sinembargo, mesun cos no ta aplica pa muhe. Pa e muhenan, un bon matrimonio ta relaciona na un menor riesgo di tin diabetes cinco aña despues. Hende muhe ta mas sensibel cu homber tocante e calidad di relacion y tin mas tendencia pa experimenta un mehoracion den su salud, danki na un relacion di bon calidad.
E ‘contracara’
E hombernan por keha di e casanan zundrado, pero no ta pa gusto, sino pa necesidad. E muhenan tin un ‘carga invisibel’ den e relacion y esun di ademas di ta casa, mester encarga di tur cos cu ta sosode na cas.
E responsabilidadnan di cas y yiu(nan), casi semper, ta cay riba nan y ora e homber realisa algo, e ta hacie pa ‘yuda’ y esey despues cu e muhe a pidie y a zundr’e p’e hacie.
Mester trat’e como un responsabilidad comparti. No ta culpa di nan pa pensa asina, ta un tema cultural cu ta bin inculca den homber y muhe desde e siglonan atras. Di mes, tin persona cu ta zundrado djis pa ta, pero loke algun ta tuma como recriminacion, ta simpel pedido pa e otro coopera cu e tareanan cu ta responsabilidad di ambos. P’esey mester educa e muchanan pa wak e responsabilidadnan como algo cu ta comparti y no como algo cu uno ta ‘yuda’, ora cu pidie.
