Esaki ta Jolanda su di dos biaha cu e ta participa den un Eleccion di Reina pa Carnaval. Despues di 30 aña cu e tabata riba escenario den eleccion di Reina Hubenil, representando su bario di Dakota. Aunke cu el a yega di baila den alrededor di 50 show pa eleccionnan di reina y mirando su experiencia no tin duda cu su presentacion lo bay score halto pa logra e corona di Sra. Carnaval Aruba 2020. Nos por corda tambe e dos coronanan cu Jolanda a conkista durante su hubentud, cu tabata esun di Miss Teen Aruba 1991 y Miss Teen Panamericano1992. E biaha aki pa participa pa Sra. Carnaval 2020, Jolanda a wordo aserca pa e comision di T.O.B. y Freddy Tromp di Popcorn Dancers. El a duda na prome instante door cu tabata falta solamente 10 dia pa e eleccion, pero nan a dune e siguridad di sostene 100%, y el a pone tur su confiansa den nan. “Tur esunnan cu conoce mi sa cu mi no por nenga Freddy. E ta un persona sumamente importante den mi bida”, ta e palabranan di Jolanda Salas.
Sra. T.O.B. 2020 tin un team yena cu experto den e ramo aki y cada un profesional den nan area. E costume ta di Edson Everon y su team, shimis oficial ta den man di e ‘amazing’ Endy Croes. Pa su show e tin full support di Freddy Tromp y su famia di Popcorn. Su preparacion, cabey y make up ta ‘the one and only’ Jennyree Geerman di Jennyree Artistry, y su speech ta di e maestra Elsa Krozendijk. Riba nos pregunta: Cua ta keda e Top 3 Miho Show di Reina cu Jolanda a forma parti di dje, el a contesta: “Definitivamente e show di Alina Mansur na Curacao den eleccion di International Carnival Queen ta mi top choice. Aki na Aruba, mi ‘favorite’ shownan ta di nos Reina di Popcorn: Osayra Romero y Maribel Andrade pa Reina Grandi.
Di e parti Jolanda su famia tambe e apoyo ta total! Su yiunan y nieta mayor ta super excited y nan a dune e confiansa pa acepta e reto aki. E tabata un momento basta emocional durante su coronacion pa mira su tata den publico cu asina un smile di orguyo y cu wowo na awa. Su mama no ta na Aruba, pero tambe ta manda mensahe casi tur dia y duna su ‘emotional support’. Y manera den tur otro desicion cu e tuma den bida, su pareha Steve Croes ta su #1 Supporter. Sin conta e ‘extended family’: Bjorn Vrolijk, Rachel Kelly y su tante Dora cu sin nan entusiasmo y apoyo, e no lo ‘make it’.
