El a lucha contra timidez, el a biba como indocumenta na Merca, el a traha pa su soñonan a pesar di e obstaculonan… y awendia e ta e cantante mas HOT di e genero urbano. El a cuminsa canta den coro di e iglesia di su colegio y desde su ocho aña el a studia na Escuela de Bellas Artes na Republica Dominicana unda el a haya lesnan di canto. Cu su 18 aña cu un maleta yen di soño, el a muda pa Bronx, New York… y e resto ta historia.
Di loke Natalia ta corda di su tempo cu el a crece den campo na Republica Dominicana ta, cu el a siña skirbi for di basta chikito. E tabata coy su schriftnan y tabata cuminsa skirbi cantica. E tabata gusta hunga cu su ruman muher y tabata un mucha alegre. El a biba su niñez plenamente y esey a yude bastante den e parti creativo. Pa locual ta su recuerdo di su prome aparicion dilanti publico tabata tempo cu el a cuminsa canta den e discotecanan. Aunke e tabata hacie desde chikito den Bellas Artes, e ta obviamente hopi diferente p’e hacie cu su propio cancionnan y spera cu e publico acepte.
Awendia tur hende conoce Natalia Alexandra Gutiérrez Batista pa su nomber artistico, Nati Natasha, e artista urbano mas aclama di momento. Su exitonan internacional ta inclui Dutty Love, cu e ta interpreta cu Don Omar; Criminal, cu Ozuna, Sin Pijama, cu Becky G, y No me Acuerdo, cu Thalía. Su cancionnan a surpasa 200 miyon di reproduccion riba e plataforma di ‘streaming’… y ta sigui yega mas. Na februari 2019 el a lansa su album ilumiNATTI, di unda ta sali un di su exitonan mas grandi, La mejor versión di mi, e tema cu a converti den su himno personal, y cu a re-lansa den un remix hunto cu Romeo Santos. Nati Natasha su album nobo lo contene fusionnan, temanan urbano y tropical, cu sin duda lo bira otro exito grandi.
