Un di e parehanan encantador cu a sali den e edicion di revista FOCUS di februari ta, Erialda y Burthney, cu a conoce otro na september 2013, atrabes di un amigo en comun na un actividad. Despues di e prome encuentro nan a bolbe sali pa compaña nan amigo pa un ‘date’ cu e no kier a bay su so, y asina nan a conoce otro un poco mas y a cera un amistad prome. Loke a pone nan dicidi pa forma un relacion di pareha ta, door cu nan ta kere cu e tipo di comunicacion y confiansa cu nan tabatin como amigo prome, a crece den emocion y e sentimentonan di un pa otro, cu despues di algun luna, a converti den un relacion di pareha. Ademas cu Erialda y Burthney por ‘agree’ tambe cu nan tur dos tabata ‘atrai’ na otro fisicamente. E ingredientenan principal den nan relacion ta; comprension, confiansa, gratitud y hopi afeccion!
Erialda ta considera su mes un persona super social y energetico, semper cu e gana di siña mas y bay padilanti. E ta traha na Builders Windows and Doors como entre otro sales & customer service. Su hobbynan ta varia entre practica e arte di makeup, ‘outdoor jogging’ y definitivamente biaha conoce mundo. Burthney ta defini su mes como un persona hopi trankilo y activo, alabes hopi sincero y directo. E ta laborando na Albo Aruba como un office engineer, conhuntamente cu un team, pa e proyectonan grandi na Aruba. Su hobbynan ta haci ehercicio fisico y den e ultimo temponan, el a haya un fascinacion pa ciga y durante e oranan liber e ta pasa tempo siñando mas di esaki y tambe hungando Ps4.
ERIALDA:
Menciona 3 cos cu bo ta gusta mas di Burthney: Mi gusta su fisico sin duda, cu e ta hopi respetuoso y tambe e manera cu e ta mustra su interes den mi fisico, sacando mi potret tur ora cu e por!
Menciona 3 cos cu bo NO ta gusta di dje: Mi no gusta cu e ta gusta kinipi mi pornada y cu e ta gusta spanta mi CUALKIER chens cu e haya, specialmente ora mi ta pegando soño! Pero tampoco mi ta gusta ora e ta keto di mas, mi sa cu algo pas’e of molesti’e y e no ta bisa mi semper di biaha.
Mi ta encanta ora cu mi pareha brasa mi of sunchi mi ‘unexpected’! Mi ta sinti contento tambe ora mi wak e hari duro!
E plato preferi di mi pareha ta ‘home-made’ lasagna of ‘big potato soup’, eventualmente tur cos ‘home made’!
Mi pareha ta rabia masha hopi mes, ora cu e puntra mi cosnan cu tin haber cu mi salud constant y mi no ta responde serio of no sincero.
BURTHNEY:
Menciona 3 cos cu bo ta gusta mas di Erialda: Cu e ta independiente /cu e ta mustra mi afeccion/y e ta semper preocupa pa mi.
Menciona 3 cos cu bo NO ta gusta di dje: Cu e no ta worry semper cu su salud /e por ta negligente /y no semper e ta cumpli cu su ‘goals’… specialmente cu gym!
Mi ta encanta ora cu mi pareha ta feliz y ta haci e cosnan cu e ta gusta!
E plato preferi di mi pareha ta Funchi cu Jambo.Mi pareha ta rabia masha hopi mes, ora cu mi tent’e y laga su cosnan di makeup cay kibra.
