Javier ta un studiante di ley cu tin un trabou di Supervisor y Instore Trainer na Primark. E impacto cu e coronavirus aki tin riba dje ta cu actualmente e ta na cas mirando cu e compania a cera te proximo aviso. E tin e privilegio cu e ta conta cu un contract vast y cu te ainda e ta na cas cu pago, paso lastimamente esaki no ta e realidad pa tur hende. Pa Javier su famia sigur e impacto ta uno fuerte mirando cu su famia ta na Aruba y bo por practicamente bisa e ta su so na Hulanda. Nan tin contacto tur dia por medio di Facetime pa asina entretene otro.
Con bo a sinti y ki bo a pensa ora a anuncia e prome caso di COVID-19 na Aruba?
Sigur mi a sinti un sentido di impotencia hopi grandi pa motibo cu mi sa locual nos akinan na Hulanda ta experenciando como pais grandi. Mi ta consciente cu Aruba no tin e capacidad pa por carga un peso di tal indole y esey ta trece hopi preocupacion cu ne mirando cu mi famia y amistadnan mayoria ta eynan.
Bo opinion di e situacion na Aruba actualmente
Mi ta convenci cu gobierno di Aruba ta haciendo su maximo esfuerso pa asina frena e virus aki di plama na Aruba. Na mes momento mi ta di opinion cu pueblo di Aruba tambe mester duna di nan parti den yuda combati e virus aki. E no ta solamente e tarea di gobierno, pero e ta un responsabilidad di cada cuidadano pa sigui tur instruccion.
Con bo ta mantene bo mes positivo durante e crisis aki?
E forma con mi ta mantene mi mes positivo ta door di mantene mi mes ocupa. Mi dia ta consisti di lanta hopi laat, cushina, lesa buki, browse riba internet, Facetime cu family and friends y Netflix.
