Daniela tabatin 11 aña, ora cu su mama a fayece, y na edad jong e mester a traha despues di scol pa por a come y paga su gastonan. Aunke e no tabata bay scol tur dia, door cu e tabata keda cansa di trabou, e tabata haya toch bon cifra na VWO. Loke cu tabata dun’e forsa den e momentonan dificil, tabata ora e corda riba e esfuerso di su mama, cu a emigra di Colombia pa e tin un mihor futuro. Dia cu Daniela a subi avion pa sigui su estudio na Hulanda, el a sinti manera cu e ta lagando un pida di dje atras. A pesar cu e no a nace na Aruba y a bin biba aki cu 5 aña, p’e Aruba ta su hogar. Awendia cu su 29 aña el a logra adkiri tur e metanan cu el a pone te cu awor; Bachelor, Master y un trabou den Gobierno Hulandes. Ademas di tur su logronan profesional, Daniela a topa cu e amor di su bida, Victor Kuipers, y nan a celebra un ‘fairy tale wedding’ aña pasa na april na Aruba.
Daniela ta kere cu tur e experiencianan cu un persona ta pasa aden den e comienso di su bida ta forma ken e ta y esaki no ta diferente p’e. E ta kere cu ta nos deber manera adulto pa reflexiona y saca na luz kico ta e cosnan di pasado, cu ta stroba bo presente y futuro. E tin hopi aña bezig ta haci esaki. Si su pasado a form’e, pero esey no kiermen cu tur cos ta mesun positivo. Awendia e ta prefera di scoge kico di su pasado e kier keda cu ne y kico no. E no ta facil, paso bo mester coba hopi profundo, pero e ta convenci, cu despues bo por ta un persona mas balansa y feliz.
Tempo cu Daniela su mama a fayece lamentablemente e instancianan concerni na Aruba e tempo ey no por a garantisa un lugar pa e keda of haya ayudo. Esey a trece hopi obstaculo financiero p’e. E mester a traha tur dia despues di scol, pa e por a come, paga huur y tur otro cos cu e tabatin mester. E tabata practicamente bibando su so, ya cu e no tin hopi famia na Aruba. Na otro banda esey tambe a hacie fuerte, e persona positivo cu e ta awendia y cu e kier yuda cambia cierto cos den sociedad door di su trabou.
Sin bo mama con bo bida a sigui tanto na cas, scol, trabou y hobby?
E no tabata facil. Pero mi tabata purba di haci bida leuk door di ta hopi activo den e mundo di baile y actuacion. Mi tabata e.o. baila den Popcorn Dancers, m’a sali reina di Colegio Arubano, presenta programa di television, bay pa Miss Teen representando FOCUS, haci teatro etc. E cosnan bunita aki a echt yuda mi focus riba loke ta bayendo bon en bes di e cosnan negativo. Mi scol nunca tabata un problema, maske mi no tabata asisti scol tur dia, door cu mi tabata cansa di trabou. Sinembargo mi tabata haya bon cifra toch na VWO. Mi ta hopi agradecido cu Sociale Fonds di Colegio Arubano tabata paga mi bukinan, uniform, etc. pasobra asina toch mi por a caba mi scol. P’esey mi ta spera cu mas instancia na Aruba tin wowo pa e mucha- of hobennan cu porta no tin manera pa paga, por ‘doe mee’ y asina considera pa tuma algun participante cu beca.
Como un ‘teener’ ken bo tabata puntra pa conseho?
Mi tin dos persona cu echt semper tabata t’ey pa mi y a duna mi hopi conseho. E prome ta Karen, e señora cu a yuda mi mama bay Merca pa e bay dokter, ora el a haya cancer. Desde cu mi mama a fayece el a sigui guia mi. Loke mas mi ta corda ta, cu e tabata kere den mi y a laga mi sinti manera mi echt por tur cos. E otro persona ta Freddy Tromp di Popcorn Dancers. Ora cu mi tabata kier bin Aruba mas biaha cu e proyectonan pa yuda nos comunidad manera “Dream, Dare, Do” Freddy a bisa mi: “Dani, si bo yuda bo mes prome pa bo yega leu, bo por bin bek y yuda mas hende!” E conseho aki a yuda mi focus riba mi mesun desaroyo.
“Ohala den un futuro mi lo por bin bek Aruba y yuda mas hende den nos comunidad.”
DI STUDIANTE PA PROFESIONAL
E bon di Daniela su tempo di scol tabata, ora cu e tabata sinti cu e ta echt siñando algo util. Asina el a te hasta logra bay cu un colega studiante Aruba pa inicia e proyecto di “Dream, Dare, Do” cu awendia Stichting Popcorn Club a sigui cu ne pa 9 aña caba, caminda e muchanan hoben ta haya un ‘leadership course’ extensivo. Loke cu si tabata un reto tempo di su scol tabata pa skirbi Hulandes na e nivel di Hulanda. Manera studiante Arubiano bo tin cu traha extra duro, pa bo haya bon punto. Tambe tin ora e tabata ripara cu hende tabata subestim’e na scol, pasobra e ta stranhero. Te ora nan wak e resultado di e toetsnan yega y nan ta ripara cu e tambe tin algo pa trece na mesa.
Ta un lastima cu hende ainda ta huzga, pasobra bo no ta di nan pais, pero bo por traha duro pa bo por surpasa esaki, manera; traha riba bo accent Hulandes. Awendia e tin menos molester di esaki, pasobra e ta mas fuerte para den su sapato y awor si su Hulandes ta riba nivel.
Na september 2018, Daniela a obtene su Master of Science (MSc.) den International Public Management and Policy na Erasmus Universiteit Rotterdam. E obtencion di e master aki ta su ‘personal achievement’ di mas grandi te awor. Tabata un reto p’e, debi cu despues di su bachelor, el a traha manera freelancer pa tres aña caba den e sector social y educativo. Durante su pre-master a scoge entre 14 alumno, cu ta haya chens di bay representa Erasmus Universiteit na un simulacro di United Nations na New York. Daniela y su colega a obtene e premio di e ‘best position paper’. Esaki ta un ‘paper’, unda bo ta propone e solucionnan innovativo pa e problemanan den sociedad actual. Esaki tabata un soño cu a bira realidad p’e, ya cu el a studia Social Work y Bestuurskunde. Su mision den bida ta pa yuda soluciona e problemanan den sociedad. Daniela su masters tabata uno hopi exigente, pero uno cu el a disfruta hopi, cu a echt habri su wowo pa loke ta e mundo di geopolitiek y Union Europeo. Ta asina el a siña con te hasta un isla chikito, manera; Aruba, por ta afecta di algo, cu ta pasa na otro banda di mundo.
Durante cu Daniela tabata bezig cu su scriptie, el a solicita pa un programa di trainee pa gobierno di Hulanda den Provincie Zuid-Holland. Den e programa aki e por wak cua ta e areanan cu mas e tin e interes, pa sigui su carera aden, ya cu cada 8 luna e tin un proyecto den un sector nobo. El a traha den ‘afdeling bestuur’ y awor e ta den sector di urbanisacion y vivienda. Ora e tabata den e departamento di directiva, el a traha pa entre otro e Commisaris van de Koning y pa e Provinciesecretaris. E ta haya hopi training, manera di negociacion, branding, bestuurlijke seinsitiviteit pa yud’e catapulta su carera.
Ki tabata bo sentimento momento cu bo a ricibi bo ‘master’s degree’?
Esaki ta algo cu mi a traha 28 aña p’e, pues mi tabata echt euforico!
Con e proceso a bay pa logra e posicion/trabou actual?
E programanan di starters (trainees) pa e gobierno Hulandes ta hopi popular akinan. Na provincie Zuid-Holland tabatin 12 posicion habri anto 338 hende a aplica! Esaki tabata echt un di e “racenan” mas intensivo cu mi a yega di participa na dje. El a dura 6 ronde, caminda cada biaha mitar di e aplicantenan tabata cay afo. Nos mester a haci entre otro; un cognitietest, businesscase, motivationtest, un video, un pitch, y un bestuurgame. Mi ta corda con mi wowonan a yena cu awa, ora mi a haya e yamada cu e noticia cu nan kier ofrece mi e posicion. Mi tabata hopi emocional, paso mi a sinti cu awor mi a logra e ‘bon futuro’ pa mi mes. “I made it!”!
Bo ta considera bo mes un inspiracion? Saliendo di origen hopi humilde pa yega unda bo ta awendia?
No perse, pero mi lo ta super contento si un persona lesa e storia aki, anto haya por lo menos un tiki mas forsa pa logra su metanan. Esey ta e unico motibo pakico mi ta gusta comparti mi storia. Mi ta spera cu asina mi por yuda hende realisa, cu bo por sali pa dilanti ‘no matter’ di unda bo ta bin.
“Bo djis mester durf tuma sacrificio, pensa den ki futuro bo kier pa bo mes y tuma e stapnan pa yeg’e.”
Cua ta e pensamentonan cu bo no ta laga stroba bo nunca?
Mi no por.
Nombra un virtud y un defecto di Daniela Kuipers Ramos?
Virtud: Mi ta traha duro, paso mi tin High-expectations.
Defecto: Mi ta hopi streng cu mi mes, paso mi tin High-expectations.
Si bo por bay un dia den bo infancia, cua dia esaki lo ta y dicon?
E ultimo dia cu mi a bay cu mi mama y mi padrastro Baby Beach. Nos a come hamburgers, hunga cabay di awa y mi a landa te ora solo a baha.
Cua ta e logro cu bo ta mas orguyoso di dje?
Cu mi a logra adkiri tur e metanan cu mi a pone pa mi mes te awor. Bachelor, Master y un trabou den Gobierno Hulandes. M’a pens’e, mi a traha p’e y awor e ta un realidad.
Credits: www.stevendecuba.com
