Bibando casi 3 aña na Hulanda, Groningen y actualmente Sue-Gin ta den su di tres aña di estudio di ley. Na februari el a caba cu su specialisacion den bedrijfjurist. E no tabata un decision facil pa Sue-Gin y su ruman Ginayla a keda Hulanda leu di nan famia memey di e crisis di coronavirus. Mas cu claro nan lo kier ta cu nan famia y ta bek na cas, pero nan a opta pa pensa riba nan prohimo, specialmente nan wela-/welonan. Nan no lo kier tabata un persona cu tin e chens di bin cu e virus Aruba y mucho menos pega otro. Na final di dia e semper ta keda dificil pa ta leu, pero Sue-Gin y Ginayla ta contento cu nan tin telefon y internet pa keda den contacto cu nan sernan keri.
Sue-Gin ta haya cu e forma con Aruba ta bezig ta deal cu e situacion ta hopi bon, den un manera trankil pero cu e medidanan cu mester. Loke si e kier bisa ta: “Cu mi ta haya hopi hende nan comportacion y accion como bon civil, ta laga hopi di desea. Nan no ta tende loke ta bisa nan (cu ta pa nan mesun bon y di otro) y tin hopi hende ‘nonchalant’ cu no ta wak e seriedad di e virus. Y ta tristo pa wak con nan no ta wak e peliger cu nan ta trece, no solamente pa nan mes, pero specialmente na otro y nos grandinan y e grupo cu ta mas vulnerabel p’e virus aki”.
Con bo ta mantene bo mes positivo durante e crisis aki?
Tur cos den bida tin su malo y su bon, mirando e banda positivo ta yuda bo keda positivo tambe, pensando cu hopi famia ta uni mas, e mundo ta haya un chens pa respira, nos tur ta sinta bek y reflexiona riba nos bida y tur loke nos ta ‘take for granted’ diario. E crisis sigur tin hopi cos negativo cu ne, pero sin duda e ta un ‘eye opener’ pa hopi hende.
Kico ta bo conseho den e tempo dificil aki?
Mi conseho ta cu den union nos tin mas forsa y trahando hunto so, nos por combati e virus aki. Y pa tur e hendenan ta meno ‘nonchalant’ y scucha loke gobierno y e profesionalnan ta bisa bo, paso ta hacie pa un motibo. Finalmente pa nos no ta egoista y corda riba nos prohimo, paso no ta bo so lo ta afecta y infecta, sino otro tambe. ‘Stay safe & stay home!’
