Cu sanger di negoshante hereda di su tata, cu a motiv’e pa inicia su carera como entrepreneur na edad di 17 aña, e diseñadora grafico; Rekha, tin un talento artistico innato y tin un linea unico di acesorio Rexa Bizou. E ta un satisfaccion inmenso pa crea algo ‘from scratch’. Door di su conocemento como diseñadora grafico e por innova constantemente, for di e detayenan di mas chikito, manera; material, color, grandura, label te na presentacion.
Rekha su tata tabata un joyero y nunca el a pensa den drenta den e mundo di joyas. Pero na 2008 a atrac’e y mat’e den su propio negoshi na Corsou. E tabata un temporada hopi scur p’e y ta prome biaha den henter su bida, cu el a sinti un tristesa asina profundo. Pero el a sinti un forsa a drente y esey a pushe pa haci su best pa biba un bida na honor na dje. Esey ta loke a pusha Rekha drenta mas den negoshi.
Rekha y Eric ta mayor di dos yiu, Aryelah y Joshua, cu prome cu e crisis di coronavirus nan rutina diario tabata cuminsa hibando nan scol mainta. Rekha tabata purba di traha mas posibel ora nan tabata na scol pa asina merdia ora nan yega cas, e por pasa tempo cu nan. Atardi nan tabata sali un rato y anochi ora nan drumi, Rekha y Eric ta pasa tempo hunto. Pa Rekha e balans perfecto como hende muher pa ta feliz ta pa nos pone Dios na prome lugar, kere den nos mes, stima nos mes, y tin balor propio. Si bo no tin esakinan, ta dificil pa tin un bida balansa.
Ki impacto e crisis di coronavirus a causa te cu awor tanto como entrepreneur, personal y familiar?
E crisis aki no a dal mi como un shock paso mi tabata mire ta bin, y mi tabata prepara p’e mentalmente. E ‘challenge’ mas grandi cu nos tin awor ta e muchanan, cu ta exigi hopi atencion di nos. Mi casa ta traha na cas tambe y ami ta purba di ta mas creativo y build mi mes up. No ta tur dia ta bay facil, paso tin dia e muchanan ta pidi hopi mas di nos, pero nos a traha un rutina y ta ‘take turns’ entre ami cu mi casa pa wak pa nan.
Como un creyente Cristian con bo ta interpreta e situacion actual a traves di bijbel?
Dios nunca a bisa nos cu nos bida ta bay ta facil, pero mas bien e ta bisa cu E lo duna nos e forsa pa enfrenta bida. Mi ta kere cu e crisis aki lo reset hopi di nos. E lo pone nos reflexiona riba kico ta importante, mustra nos y nos gobernantenan nos fayonan y cuminsa pone Dios na PROME lugar bek. Mi ta keda kere den Salmo 91 cu ta e promesa di Dios pa nos den e tempo dificil aki.
Ki ta algo cu tin bo preocupa aunke bo ta un muher di Fe?
Loke ta preocupa mi NO ta e coronavirus mes, paso mi ‘faith’ ta mas grandi cu mi ‘fear’. Loke si mi ta pidi Dios ta pa nos gobernantenan tuma e desicionnan corecto. Paso tur desicion cu nan tuma awor lo afecta nos y nos yiunan. P’esey tur dia mi oracion ta pa Dios illumina nos gobernantenan pa nan haci loke ta su boluntad.
Ki ta bo opinion di e forma con Aruba ta atende cu e pandemia aki? (Tanto gobierno y comunidad)
Gobierno ta haciendo su best y ta logrando pa ‘flatten the curve’. Gran parti di nos comunidad ta cooperando y mi ta wak cu hopi ta yudando esunnan den necesidad y esey tambe di aplaudi. Si nos sigui asina mi ta sigur cu Aruba lo lanta bek mas lihe cu nos ta pensa!
