Den e edicion di november 2014, Franklin y Elsa Richardson, hunto cu nan triyeso: Tialda, Lia-Sophie y Zia-Marie tabata riba e portada di revista FOCUS, pa celebra e prome cumpleaño di e triyeso dia 7 di november. Un triyeso cu tabata concebi di forma natural y ta considera e tipo di embarasonan aki como uno di risico halto. E caso e triyeso aki ta uno, unda cu 2 ovulo a fecunda y 1 di nan a sufri un division: Tialda y e morochonan Lia-Sophie y Zia-Marie.
E triyeso ta hopi activo: nan ta gusta core bicicleta/ step y bula den trampolin. Nan ta gusta pinta y hunga cu nan cosnan cu nan tin pa hunga (Barbie, cushina, lego etc.). Nan ta gusta tambe ora cu nan bay lama. Naturalesa ta trek nan atencion hopi, principalmente ora di bay subi Hooiberg, bishita Kapel di Alto y Vista y bay cana den naturalesa y tambe cana riba Linear Park.
Con un dia ta cu boso triyeso?
Franklin ta lanta 4:15 di mainta pa cushina. Elsa ta lanta 5:00 di mainta pa prepara cuminda pa tur hende hiba scol y trabou. Rond di 5:20 di mainta ya Tialda, Lia-Sophie y Zia-Marie ta lanta pa cuminsa baña, bisti paña y despues come nan desayuno. Bañamento, bistimento di paña, peña cabey y come desayuno mainta ta tuma su tempo. Pa 7:00 di mainta nos ta sali pa hiba nos yiunan scol. Den e caso aki e porta di scol ta habri trempan y nan meester ta yega hopi trempan, cu asina nos por laga nan y nos por sigui rumbo pa nos trabou.
12:30 merdia scol ta caba y nan Opa Frank ta busca y trece nan cas, caminda nan Nana Leonor ta na cas pa ricibi y wak pa nan cu ayudo di nan Oma Dita. Aki nan ta come nan cuminda cayente y refresca curpa.
Despues di scol nan ta na cas ta hunga of ta atende algun deporte cu nan ta practica durante siman.
Pa 6:00 di atardi nan ta prepara pa come. Despues di come nan ta baña y prepara pa bay drumi. Prome cu nan drumi nos ta conta storia. Nan ta scoge e bukinan na un biblioteca cu nos ta bishita y tur anochi nos ta conta nan un storia. Nos ta haci un oracion chikito y asina nan ta bay drumi. Pa mas tarda 7:15 di anochi nan tur tres a pega soño.
Nan ta sigui bon di salud?
Danki na Dios cu si, pero cu e controlnan di pediatra (Dr. Thorson), oftalmologo (Dr. Moreno) y optometrista (Stephanie Thiel) y otorinolaringologo (Dr. Cabenda). Un control no ta nifica cu nan ta malo, pero door di ta prematuro esaki ta necesario.
E control cu oftalmologo ta pasa cada 12 luna. Zia – Marie ta bisti bril. E motibo di esaki ta cu el a ricibi hopi oxigeno (artificial) ora el a nace y cu consecuencia cu el a afecta su bista, den e caso aki solamente un wowo ta afecta na 60%.
Pediatra y otorrinolaringologo ta varia den 3 pa 6 luna cada biaha.
Tambe como cu tur tres a nace prematuro semper mester keda vigila e parti respiratorio, ora tin un griep paso nan pulmon ta keda delicado. E control aki ta pasa cerca nan pediatra cu semper ta atento cu nan salud.
Nos por bisa cu e bishita di otorinolaringologo ta esun cu mas ta haya atencion, debi cu e oreanan ta delicado y door cu nan ta bay les di landamento, e otorinolaringologo ta desea di keda controla e parti aki. Aki nos por añadi cu Lia-Sophie no solamente tin problema cu e orea, pero tambe cu su amandel di garganta y nanishi. Pa esaki Lia-Sophie ta bishita e dokter mas frecuente.
Con boso ta comparti e responsabilidadnan?
Den e caso aki nos no ta comparti responsabilidad mas bien nos ta un team, pasobra un persona so no por haci tur cos. Nos ta haci mayoria cos hunto. Por ehempel si tin mas cu un actividad riba e mesun momento (bishita di dokter of deporte), e ora nos ta split y ta bay den auto apart. Hopi biaha mester planea e dia pa asina e dia por bay organisa y pa e tempo por yega pa asina nos por logra tur nos metanan pa e dia. Nos por bisa cu nos ta bibando cu rutina. Segun e articulonan cu nos ta lesa, esaki no ta e mihor opcion, pero nos ta experenciando cu tres yiu esaki no por otro na e momentonan aki di nos bida. Nos ta convenci cu esaki pronto lo cambia.
Como famia kico boso ta gusta haci?
Na cas mes nos ta purba di haci cos hunto, specialmente den weekend, e dianan liber y vakantie. Ya cu durante dianan normal di trabou, nos no ta alcansa pa haci tur cos hunto. Como famia nos ta haya cu e parti religioso ta importante y nos ta lanta nos yiunan den esaki. Nos ta gusta bishita Santo Sacrificio di misa hunto como famia.
Kico tabata mas dificil den e 6 añanan aki?
Den e 6 añanan aki tras di lomba tabata tin su parti dificil y su parti menos dificil segun cu nan ta birando grandi. Su parti dificil, ta cu como mayor nos mester educa nos yiunan riba structura y disciplina. Cuminsa siña nan e bon y naturalmente e malo tambe den tur situacion cu presenta. Scoge kico ta bon of malo pa haci, cual no ta facil, pasobra pa tur mucha tur cos cu ta briya ta oro. Tur cos cu nan mira nan ta desea. Como mayor ta siña nan cu tur cos tin un limite y cu no ta tur cos nan por haya.
E parti menos dificil ta cu nan ta mas independiente. Den e 6 añanan tras di lomba nos a wak con nan a crece bira fuerte y nan ta hopi mas independiente. Y nos kier stimula esaki pa asina esaki ta parti di nan educacion.
Tambe nos ta pidi nos bon Dios duna nos como nan mayornan bida y salud pa nos por sigui wak nan crece y bira hende muher fuerte y balente.
Ki conseho boso tin pa otro mayor cu tin embaraso of yiu multiple?
Tur periodo tin nan obstaculonan, esey nos ta experienciando. Lanta un yiu awendia no ta manera antes ora cu nos a lanta. P’esey nos ta recomenda e mayornan aki pa ta un TEAM! Nos como mayornan ta yuda y sostene otro den tur cos pa asina nos yiunan tin beneficio di esaki. Pasenshi y perseverancia ta e ultimo cosnan cu nos ta perde.
Kico ta e gastonan promedio mensual di e triyesonan?
E gastanan promedio aki ta basa riba alimentacion, parti higiena, deporte/ recreacion, alimento y diberticion den famia cu tin un gasto di 1550 florin pa luna. Esaki ta basa riba Tialda, Lia-Sophie y Zia-Marie solamente.
Scol:
Mon Plaisir School (actualmente nan ultimo aña escolar di scol preparatorio)
Hobby:
Tialda ta gusta pinta y wak buki di prenchi
Lia-Sophie ta gusta wak buki di prenchi y hunga pafo
Zia-Marie ta gusta canta y wak buki di prenchi
Deporte:
Landamento, gimnasia y atletismo. Pa e parti recreativo nan ta atende ‘Beyesima’ tur diasabra atardi (Arubaanse Padvindsters Gilde (APG) y tambe un ‘zondagsschool’ na Misa Birgen di Fatima na Dakota tur diadomingo atardi.
Caracter:
Tialda: un mucha hopi atento, pero cu un caracter dificil. Hopi biaha e tin dificultad pa scoge loke e kier. E no ta adapta facil na cambio y mester papia cu ne di antemano cu e cambio ta bin. Ta pa e motibo aki Tialda ta haya ayudo di un psicologo di mucha, esta Micheline Raymond. Tialda ta gusta e encuentronan cu Micheline y nos ta cuminsa wak cambio den Tialda.
Su personalidad ta un mucha lief y gusta yuda semper. Tialda ta expresa su mes bon. Tialda tin hopi caracteristica di su mama.
Lia-Sophie: un mucha cu por cu tur situacion rond di dje. E tin un personalidad hopi fuerte y hopi biaha ta haci cos sin pensa e consecuencia. Lia-Sophie tambe ta expresa su mes bon y ta bisa kico e ta desea.
Lia-Sophie tin un mescla di caracter di su mama y tata.
Zia – Marie: un mucha cu por cu tur situacion rond di dje. Zia-Marie ta adapta su mes hopi lihe na cambio. Zia-Marie ta hopi trankil y hopi tolerante. Zia-Marie tin hopi caracteristica di su tata.
Hair & Makeup: Hair Factory
Outfit: D Shop Aruba
Fotografia: Suhaila Alders
Localidad: Residencia Richardson
Entrevista: Sue-Ann Laclé Ras
