E crisis aki a impacta Adrienne su bida profesional como abogado, pero tambe su bida personal. E ta afortuna di tin suficiente trabou ainda, pero na mes momento a nota un caida drastico den e cantidad di trabou cu nan como abogado tin normalmente. Su bida personal tampoco ta mesun cos. Su rutina diario di bay gym prome cu e bay traha no ta existi y mescos cu tur otro persona mester haci ehercisio na cas. E momentonan mas special pa Adrienne y su pareha Cliff ta biaha, conoce otro pais, otro cultura of siña mas di e historia di e pais y conoce diferente hende, pero esaki mas cu logico a para ‘per direct’ y por lo pronto no lo tuma lugar tampoco. E crisis aki a impacta tur hende, mundo henter, y riba diferente parti di nos bida pero na mes momento el a obliga nos tur pa para keto y realisa con fragil bida por ta. E ta pone nos aprecia e cosnan di mas chikito den nos bida y tambe nos sernan keri mas aun.
Con bo rutina diario a cambia?
Mi ta trahando ainda na oficina di Kuster Law como cu abogacia ta considera trabou esencial, pero nos tambe na oficina ta traha cu un skeleton crew di cual nos, e abogadonan, ta forma parti di dje. Mi ta traha tambe for di cas ora cu ta necesario/ora cu ta duna. Mi ehercisionan tur ta tumando lugar na cas cu sea dumbbells, kettlebells, bands, elastics, drills, HIIT, y asina mi ta keda varia. Pa loke ta famia mi ta extra atento di mi mayornan durante e temporada aki, en particular mi tata. Como cu mi tata ta un pashent di cancer y ta cay bou di e risicogroep, nos tur den famia ta extra cauteloso pa su salud y ta percura pa tuma tur paso- y medidanan necesario.
SHELTER IN PLACE
Adrienne ta entretene su mes mientras cu tin ‘shelter in place’ cu board games, online trainings pa su mesun algemene kennis, wak movies, Netflix y cushina, pero tambe ta probecha pa haci limpiesa grandi den cas, unda cu tur articulo cu no ta necesario nan ta duna na personanan cu menos recurso. Den su caso, como cu e ta trahando ainda tur dia y ta druk tambe tur dia, e mester bisa cu e no ta sinti e ‘last’ di no tin nada di haci na cas. Adrienne su recomendacion pa mantene bo curpa y mente saludabel den e momentonan aki, ta pa tene bo mes ocupa. “Lanta mainta y haci ehercisio na cas. Tin asina tanto video y apps cu por download pa asina bo por haci ehercisio durante e temporada aki. Tanten cu nos por sali y cana ainda, probecha, pero siguiendo semper instruccion y tips di Gobierno di Aruba y DVG. Mas importante awor cu nunca ta pa nos come saludabel. Ningun di nos ta sigur con e situacion lo ta aki 1 siman of aki 1 of 2 luna. Sea consciente y no malgasta placa ta come afo cada rato. Probecha y uza bo tempo pa cushina na cas y siña algo nobo. Pero mas cu tur cos, tene bo mente sano, keda positivo y corda cu hunto so nos por surpasa e situacion aki lo mas lihe cu ta posibel. “We’re all in this together!” No ban warda e situacion empeora pa e ora nos realisa con serio e ta”.
Ki bo ta opina di e comportacion di e hendenan en conexion cu e ‘toque de queda’
Tin un grupo grandi cu ta respeta e medidanan di Gobierno di Aruba y ta haci nan maximo esfuerso pa cumpli cu esakinan. Esaki sigur ta di aplaudi. Pero no ta un grupo grandi so ta necesario pa nos combati e virus aki, sino Aruba completo. E ta rekeri cada un di nos, grandi y chikito, pa respeta e medidanan. Lastimamente, semper lo tin un grupo di persona cu no kier tende, of ta pensa cu nan sa mihor. Na prome instante y ainda tin un grupo di persona cu no ta tuma e medida aki na serio, y toch ta dicidi di haci otro. Y esey ta di lamenta. Paso cada caso nobo positivo di COVID-19 ta hiba nos isla un stap atrás, y ta hacie mas dificil pa Gobierno kita e medidanan pa asina e situacion ful rond di nos isla por cuminsa normalisa.
