Career IQ ta presenta “Restart Conversations – Virtual Summit”. Ta trata di un conferencia gratis online cu lo consisti di tres parti y ta tuma luga riba tres diferente diasabra den luna di mei. E tres partinan di e serienan online ta: 1. Economia y Entrepreneurship, 2. Turismo y 3. Innovacion y Responsibilidad Civico. Diferente orador lo comparti nan conocemento riba e temanan aki y hunto cu esaki lo tin e panelistanan invita, unda lo trata e preguntanan di e participantenan di e virtual summit. E meta principal di e conferencia virtual aki ta, pa crea oportunidad pa haci e discusionnan den e areanan aki y ta teniendo cuenta cu e situacion cu mundo y Aruba ta pasando aden, esta COVID-19. Career IQ kier stimula combersacion entre tur e participantenan pa pensa con pa por “restart” Aruba durante y despues di e crisis mundial aki.
E discusionnan aki lo ta retorico cu e mensahenan positivo, pa asina inspira e participantenan pa participa y tuma accion den nan seno y sigui crea un “ripple effect” di optimismo den nos comunidad pa rehabilita nos isla. E summit por trece balor agrega pa un participante mediante e conocemento cu e lo haya den e tres partinan menciona y alabes e por descubri ki oportunidad tin. E responsabilidad civico di tur Arubiano ta pa rehabilita nos isla y participando na e conferencia aki, bo por forma un parti activo den esaki door di haci pregunta na e profesionalnan di Aruba y wak nan perspectiva riba e temanan aki. Un otro parti ta cu lo trata e ideanan creativo y innovativo di e “15 idea challenge” cu Career IQ a haci den nan “book club” como parti di e “book club initiative” di escritor internacional Simon Sinek cu su buki “Start with WHY?”.
Primeramente diasabra 2 di mei lo tin e session di Economia y Entrepreneurship. Lo tin dos presentacion di oradornan invita, riba Economia lo ta Rendell de Kort cu ta e “Chief Data Officer” na Cornerstone Economics. Riba Entrepreneurship lo ta Jairo Boekhoudt cu ta e managing director di JdB Agency, cu ta un creative advertising and marketing agency na Aruba. cu ta estableci 10 aña pasa caba como un accion directo di e crisis economico di 2008. Directamente despues di cada presentacion di e oradornan lo tin panelistanan pa discuti riba e topiconan aki. Den economia: Maria Dijkhoff-Pita (Directora di Departamento di Asuntonan Economico, Comercio y Industria di Aruba), Marielsa Croes (Economista di MGM Source Economic Financial Investment), Luenne Gomez (Directora di Departamento di Impuesto) y economista Rendell de Kort. Siguiendo e sesion di Jairo lo ta un panel di entrepeneurs cu lo ta Atan Lee Jr. (Propietario di Peanuts Restaurant), Francis Saladin (Director di FRASA), Lindy Croes (Representante di Camara di Comercio Aruba) y Jairo Boekhoudt. Durante tur e panelnan aki abo como participante por manda bo pregunta pa e panelistanan y asina forma parti di e discusion.
E di dos diasabra di e 3-part series summit lo ta 9 di mei cu focus riba turismo. Lo tin dos panel riba e dia aki consistiendo di: Ronella Tjin Asjoe Croes (CEO di Aruba Tourism Authority), Tisa La Sorte CEO y Presidente di Aruba Hotel & Tourism Association), Ryan Peterson (General Manager Economic Policy Centrale Bank van Aruba) y Jo-Anne Arends (Air Service Development Manager na Aruba Airport Authority). E Segundo panel di e mainta aki lo ta Zena Neme (CRAFT), Kimberly Rooijakkers (Manager di Boardwalk Hotel), Dylan Molina (Pelican Group) y Maureen Every (Managing Director Eco Destination Management). Por ultimo diasabra 16 di mei lo tin e sesion di innovacion y responsabilidad civico. Nan lo tin un presentacion di FUTURA cual ta e departamento di innovacion sigui pa un panel discussion di Jessica van Montfoort-Posner (Aruba Aloe), Christie Mettes (Brenchie’s Lab y Metabollic Foundation), Ashley Krosendijk (Local Pride) y un representante di Futura.
Career IQ Aruba ta un show na radio presenta pa Kareline van der Linden y Darice Solognier unda cu tur siman ta brinda varios conseho practico y eficiente enfocando riba e lidernan local den nos comunidad tocante con cada un di nos por desaroya nos propio carera, alcansa nos metanan y logra disfruta e bida cu nos tur ta desea. Tambe e programa tin un seccion asina yama “Surviving 8-5” unda ta ofrece e tipnan practico riba diferente area laboral. A lansa e show na 2019 y awe e ta den su di 4 temporada cu mas di 40 entrevista cu diferente lider local. Hunto cu e damanan di Career IQ tin un grupo di boluntario di Young Professionals ta organisando e conferencia virtual aki, cu ta Sue-Ann Lee, Darysse Croes, Marisol Sanchez-Maldonado y Ryon Dijkhoff. Como moderador lo fungi Darice, Kareline y Ryon riba e diferente dianan aki.
Pa bo por participa of pa haya mas informacion di e conferencia virtual aki bo tin cu simplemente subi e pagina di “social media” di Career IQ Aruba riba Facebook of Instagram. E summit aki lo tuma lugar riba diasabra 2, 9, 16 di mei di 10 or pa cuarto pa 12 di mainta. Tuma nota cu e cuponan ta limita. E conferencia virtual aki lo wordo streamed live tambe riba Tele Aruba canal 13 y Facebook Live di Career IQ Aruba y Tele Aruba. Registra y asina forma parti di e combersacion pa “restart” Aruba, nos dushi isla.
LINK pa registra: Click e links akibou y registra bo mes pa e conferencia virtual gratis aki
ECONOMY & ENTREPRENEURSHIP:
TOURISM:
https://us02web.zoom.us/webinar/register/WN_LB1ghrkFSpW60wuUn6GMYA
INNOVATION & COMMUNITY:
https://us02web.zoom.us/webinar/register/1415868022297/WN_xn_MY1igTK2ur3IwObdY0Q
