E ta alegre, sincero y transparente y ta e tipo di persona cu ta loke bo ta mira. Competencia ni envidia ta preocup’e paso e ta muher Bendiciona. Marta Collell tabata e portada di FOCUS na januari 2016. El a bisa den su entrevista cu e ta sinti cu Aruba a yud’e descubri algo cu ta biba den dje, aunke semper el a gusta e mundo di makiyahe. Marta ta originalmente di Spaña y e motibo cu el a muda pa Aruba na 2009 ta debi cu el a encontra e amor di su bida durante su prome bishita pa pasa vacantie cerca su ruman muher, cu ta biba aki pa algun aña caba. Despues di un luna e tabata bek na Aruba y su experiencia como stranhero tabata pa adapta na un pais nobo cu otro costumber, otro idioma y estilo di bida, leu di su famia.
E plannan cu Marta Collell a comparti na inicio di aña 2016 cu e ta bay lansa su website y un canal via youtube pa yuda e hende muhernan resalta nan beyesa, a keda realisa exitosamente. Riba su website www.martacollell.com den ‘sobre mi’, e ta skirbi cu su pasion pa beyesa y moda ta bin desde su infancia. El a cuminsa makeup su amiganan y den corto tempo el a demostra su habilidad special te cu tempo e hobby aki a bira su profesion. Convenci di su pasion pa makiyahe, Marta a studia na e academia hulandes, “Beauty with style“, tur locual ta encera beyesa y makiyahe. Marta ta encanta biaha y semper cu e por y trabou ta permiti’e ta probecha pa haci curso y actualisa den e ultimo tendencianan y tecnica di beyesa, sinembargo e ‘aprendizaje’ di cada dia ta loke cu mas e ta disfruta.
Su mision ta yuda e muhernan pa nan sinti sigur di nan mes y mas Bunita cu nunca cu e ayudo di producto- di beyesa y su consehonan, ya cu Marta ta duna tambe lesnan personalisa di makiyahe. Su specialisacion ta den makiyahe pa novia, y e ta sigura su mes di analisa cada detaye, ya cu cada novia ta unico… garantisa no solamente un makiyahe perfecto, sino e expresion maximo di su beyesa riba un dia inolvidabel. Su filosofia di bida ta: “Trabajar en lo que te gusta, mantenerte humilde, rodearte de gente positiva y ser feliz“. Marta Collell su dedicacion, esfuerso y perseverancia, ta loke a combertie den un makeup artist cu briyo propio. Diamars awor dia 19 di mei pa 5’or di atardi, Marta ta LIVE riba e Facebook page di FOCUS cu TIPS pa un Makiyahe Facil y Rapido pa tur e hende muhernan.
