Como director y artista na Ateliers ’89 Academia di Bellas Artes Aruba, e tabata hopi duro pa tuma e desicion di mas grandi ‘ever’, esta pa stop y cera e workshopnan consecuencia di COVID-19. Den un par di dia, Elvis Lopez mester a despidi di e maestronan di e workshop di video y laga nan bay bek Amsterdam, cu e ultimo vuelonan di KLM. Entre e grupo a biaha tambe dos co-organisador di Hulanda y tres artista den residencia, dos di Portugal y un di Francia.
Elvis Lopez presente na FOCUS Awards Night
Hopi biaha ora un workshop termina, Elvis ta experiencia un periodo di hopi cansancio unda soledad ta hunga un rol inmenso. Despues di tur e accion di les, opening, etc… e ta bira malo. E biaha aki a bay mescos y el a bira malo, y a kere cu e tin e coronavirus. Elvis a bay den panico formal y el a hinca su mes hunto cu su ruman den cuarentena pa casi dos luna.
REDECORA Y VERF OFICINA
Elvis ta comparti un video cu el a graba den su oficina na Ateliers ’98, cu a wordo cambia despues di 14 aña cu cosnan simpel, recicla y sin ningun luho. El a logra porfin di haya e tempo pa redecora y verf. E prome cos cu el a haci ta desinfecta su oficina y scol, cu a inclui tambe tur klas, salanan y tambe e airconan. E motibo cu su oficina nunca ta wordo geverf of redecora desde un principio, ta paso tur otro local, sala, exposicion y apartamento tabata prome. Den e ultimo simannan, Elvis a logra tambe pa traha riba hopi idea nobo y ta bezig cu un obra nobo cu a wordo encarga.
Pa locual ta concerni e siguiente paso di Ateliers ’89, cu aunke a dura hopi nan a logra alafin pa pone un workshop on-line. E prome workshop on-line ta gratis y Elvis a bisa cu esaki sigur ta fantastico: “Actualmente mi ta trahando duro pa cuminsa fin di juni cu workshop di tekenen manera semper e workshopnan ta, pero awor cu distancia y sin cantina. A cancela Caribbean Linked VI 2020 cu lo a tuma lugar na juli pa juli, augustus 2021. Mi ta spera cu nos por sigui cu nos workshopnan y realisa tur e workshopnan segun nos programa di 2020. Si ta asina, lo nos haci Teatro na augustus, Fotografia na september, Pintura na october y Moda na November”.
CELEBRACION CUMPLEAÑO
E celebracion di e cumpleaño di Elvis Lopez, cu ta un persona cu ta destaca semper pa su estilo di bisti artisticamente vibrante y su personalidad carismatico, tabata djis cu menos hende manera cada aña, sinembargo esaki ta un celebracion di henter e siman manera semper. Cu hopi ‘highlights’ fantastico manera e comemento cu su rumannan y su fiesta di tres na House of Mosaic di Fernando Mansur, cu manera semper ta FAB! Pero nada no ta surpasa e regalo mas grandi den su bida, cu ta e donacion di un auto for di Garage Centraal Aruba! Elvis ta sumamente agradecido pa e regalo aki: “Un bus H1 nobo pa Ateliers ’89 cu sticker y tur cos ariba dje, un sorpresa grandi… WAW! Y naturalmente mi kier gradici señor Mich Biegstraaten, su señora Noraina Pietersz, gerente y tur trahado hopi hopi mes pa e gesto asina bunita aki. Na final mi kier recorda cu Garage Centraal ta yuda comunidad locual ta e cos di mas bello”.
NUNCA MAS NA NORMAL
Puntrando e artista con e ta prepara pa e ‘bida normal’ nobo despues di e pandemia aki, el a bisa cu henter e periodo tabata hopi straño y un experencia unico. Na nos normal no ta bay bek nunca. Si nos a siña cana bek tur mainta y un rutina diario awor p’e ta snorkel y duik, cu semper el a gusta masha hopi. Awor tur dia lo ta un experencia nobo y cu sorpresa, dus nos ta sigui dilanti y cu hopi gana y forsa cu mente limpi. Su mensahe: “Mi ta spera cu tur hende a logra siña algo di e periodo aki y cu lo nan carga esaki semper cu nan. Cu nos hendenan compronde cu nos mester cuida nos mundo. Vooral nos medio ambiente. Y cu no mester tanto polucion innecesario. Cu nos realisa hopi bon, cu nos tin un biba so. Na unda cu nos tin di cuida, stima y hopi mas di cerca nos arte, nos cultura y nos beyesanan natural, hunto cu nos hendenan, nos cas, nos famia, nos animalnan, nos isla, nos mundo”.
