Cu 74 aña di edad e señora, Joan Mcdonald, ta inspira e hendenan rond di mundo, cu su ‘fitness journey’ cu a cuminsa tres aña pasa. E señora aki tabatin diferente complicacion cu su salud prome cu el a cuminsa train. E tabata tuma medicina pa hipertension y acid reflux, tambe e tabata sufri di artritis. Joan ta bisa cu e tabatin hopi dificultad pa lanta fo’i cama. E tabata sinti cansa, emocional y tabatin e necesidad pa un cambio. Su yiu muhe, Michelle, a bin cerca dje un dia casi yorando pa bise cu e mester tuma un decision. Si su mama keda riba e mesun caminda cu e tabata e momento ey, su salud lo por bira pio. El a ofrece su mama e oportunidad pa train hunto cu ne den luna di januari na 2017.
Joan Mcdonald su yiu muhe ta un powerlifter competitivo, chef profesional y doño di Tulum Strength Club na Mexico, dus e tabata sa cu e por a yuda su mama yega na su metanan. Na 2017 cu Michelle a trece su mama Mexico, el a siñ’e con pa come saludabel, yude cu su forma y tecnica adecuado ora e uza dumbells y ekipo di gym. Joan tambe a siña con pa uza un iPhone pa su trainingnan, meal planning y pa ‘track’ su proceso. Asina señora Mcdonald a cuminsa cana pa haci su ehercicio di cardio, tambe practicando yoga y despues el a cuminsa cu ‘weight lifting’.
Den e seis lunanan cu e tabata haci ehercicio, el a wak cu el a perde 45 liber. Despues di dos aña el a perde 20 liber mas. Den total el a perde 65 liber di peso desde cu el a inicia cu su rutina di training na 2017. Joan su meta inicial tabata pa baha peso, pero mientras e tabata continua su cu regimen di ehercicio, el a cuminsa wak definicion di su musculonan. E ta bisa: “Hende ta kere cu hisando peso na mi edad ta horibel pa bo curpa. Pero mas peso bo uza, mas fuerte bo wesonan ta bira. Dicon bo lo kier tin weso debil?”
Tempo cu Joan a baha 45 liber den 6 luna, el a pose hunto cu Michelle pa e portada di D’Fyne Magazine. Aña pasa Michelle a traha un Instagram account pa su mama, pa e por comparti su trayecto di transformacion den fitness. Awor su account @trainwithjoan tin mas cu 770 mil followers. Cu su platform e ta yuda inspira miles di hende. Desde su trayectorio di fitness/journey di fitness, el a aparece riba diferente cover di revista, y asta a gana un competencia di fitness. Pero loke e ta mas contento di dje ta, cu e no mester uza medicina mas pa su complicacionnan di salud. Su mente, curpa y relacionnan ta awor mas saludabel.
