Un escultura di madera di e First Lady, Melania Trump, cu ta situa na su cuidad natal Sevnica, Eslovenia, a wordo kita despues cu el a wordo kima durante e dia di Independencia di Merca, segun e artista cu a encarga cu e escultura. E artista, Brad Downey, a bisa cu el a ricibi un yamada di e departamento di polis, puntrand’e ki pa haci cu e escultura. E ta bisa cu e estatua di Melania Trump a wordo kita dia 4 di juli y el a pidi e hendenan pa no distribui e potretnan di e figura kima, pa asina e no bira un ‘meme violento’. Brad Downey a presenta un reporte policial, pero el a bisa cu e ta interesa pa haya e personanan cu a haci e echo aki, aunke e no ta interesa pa presenta cargo contra di nan.
Downey a bisa: “Mi ta curioso pa wak ken a hacie, esey kiermen cu un hende no a gusta kico e escultura ta representa of con e ta mustra”. E ta haya e momento di e atake, cu tabata riba e Dia di Independencia di Merca, ta significa cu e tabata un acto haci deliberadamente. Downey ta splica cu e tabata inspira pa traha e escultura aki pa loke el a yama e ‘narrativa anti-inmigracion’, cu ta sali di kico Donald Trump generalmente ta vocifera. E ta bisa cu e ta un ‘contradiccion’ cu e president di Merca ta haci e detencion di inmigracion e base di su presidencia, pero e ta casa cu un inmigrante cu su prome idioma no ta Ingles. Brad Downey a bisa cu e ta trahando riba un reaccion artistico riba e atake y lo haci un video di e media su respuesta tocante e escultura. Downey a bisa tambe cu probablemente e ta bay purba di haci algo na e lugar unda e escultura tabata poni.
