The Chainsmokers a ser critica fuertemente pa nan concierto durante e fin di siman, mientras e casonan di COVID-19 ta sigui aumenta na Merca. E concierto cu tabata parti di e serie di ‘Safe & Sound’, a tuma luga riba diasabra 25 di juli na New York. E tabata wordo promove online manera un “Drive in Music Experience”, cu lo bira e standard di e eventonan venidero. E organisadornan a bende 600 ticket pa e autonan cu drenta e luga di concierto. Ta reporta cu alrededor di 2000 hende a atende e concierto. Sinembargo varios hende cu a bay e concierto a comparti video- y potretnan online, unda ta mustra cu tabatin hende ta baila y canta pafo di nan auto, aparentemente ignorando e precaucionnan di salud publico. Un video di Chainsmokers su manager, ta mustra con un grupo masivo di hende ta hunto dilanti e stage den e distancia di 1.5 meter.
E espectaculo a yama atencion di e gobernador di New York, Mr. Cuomo, el a tweet dia 27 di juli: “E videonan di e concierto celebra den Southhampton diasabra ta mustra violacion horibel di distanciamiento social”. El a agrega: “E Departamento di Salud ta bay haci un investigacion. Nos no ta tolera peligro na e salud publico”. E organisadornan di e evento ta bisa cu e autonan tabatin espacio designa pa nan parkeer dilanti di e stage, unda esunnan cu a atende e concierto tabata instrui pa no sali si no ta pa uza e baño. Tambe, na e yegada e temperatura di e personanan a wordo tuma y tabatin hand sanitizer y mondkapjes disponibel. Alex Pall y Drew Taggart di The Chainsmokers no a duna niun comentario tocante di e opinion publico.
