Na 1999 Lizayra Tromp-Polak a participa na e eleccion di Reina di Carnaval pa Coastal. Diescuater aña despues el a competi den e certamen di Festival International de la Belleza del Millenio, cu a tuma luga na Sto Domingo, unda e tabata mester t’ey fisicamente presente, E certamen aki ta uno cu e por categorisa bou di un certamen ‘normal’, unda tin entrevista cu hurado, actividadnan di grupo, pasarela, photoshoot y gala. Su experiencia como participante den un certamen di beyesa y carnaval ta hopi diferente. E biaha aki pa e certamen di Reina Vitual International e no mester biaha bay niun caminda, tur cos lo tuma luga for di e sala di su cas, den un manera di bisa.
E certamen lo ta completamente online, es decir por medio di facebook y Instagram. Insta: pasarelaoflatinamerica y Facebook: Reina Virtual International. Tin 3 categoria: Infantil 7 pa 14 aña – Juvenil 15 pa 26 aña – Señora 29 pa 50 aña. E organisacion ta buscando e siguiente ‘virtual face’… E muhe mas bunita, talentoso y carismatico di Latino America. Lo tin un ganadora den cada categoria y e ultimo tresnan lo competi contra otro pa e titulo maximo. E certamen ta basa riba diferente reto, por ehempel talento y actuacion. Te na final e parti di ‘certamen’ mes ta bin aden cu ta pasarela y gala. Tur reto ta ser graba y manda pa e organisacion, cu lo publica esaki riba nan Instagram y Facebook page. Door cu e ta virtual ta haci tambe cu hopi mas candidata por participa mirando cu e costo ta mas abou.
Den ki forma bo ta sinti e certamennan aki ta enrikese bo bida?
Semper mi ta bisa ta depende con abo ta wak bida. Con abo ta wak e glas? Mita yen of mita bashi? Esaki tambe ta aplica pa un certamen, ta depende na cada persona cu ki bril nan ta wake. Mi tin 3 aña activo ta preparando candidata pa Miss Youth Aruba, e ta algo cu semper mi a gusta. E certamen aki ta diferente mirando e retonan cu tin cu eherce. Pa ami e ta un manera pa reta mi mes, pero di un otro forma. No profesional sino personal.
Ki beyesa ta representa pa bo como ser femenino?
Beyesa ta hopi mas cu dijs e midinan perfecto y un cara bunita. Beyesa ta entre otro bo siguridad personal, caracter, intelecto, sentido spiritual y bo siguridad. Tempo no ta para, ni e cambionan nan nos curpa. Stima bo mes… Esaki ta mi mensahe y e motibo di mi participacion na e certamen. Nos mester stop di kibra otro como sernan femenino y apoya otro. Nos tur ta bunita den nos mesun manera.
Den ki forma e pandemia a afecta bo tanto profesional como personal?
Pa nos tur e pandemia lo trece cambionan tanto den e area profesional como nos bida personal. Den e area profesional sigur e tabata un reto pa mi mirando cu pa e ultimo aña mi a dedica mi mes na e sector di crucero, y manera nos tur sa esaki ta para y ta para ainda. Na mesun tempo memey di tur caos tin e oportunidadnan ta presenta y asina a dicidi di haci uzo di mi experticio den mercadeo, pa yuda otro comerciantenan durante e pandemia aki. Awe algun luna despues LP Consulting ta brinda diferente servicio na diferente comerciante den area di benta, mercadeo y maneho general. Personalmente mi no por bisa e pandemia tabatin un efecto negativo riba mi sino mas bien positivo dor di extra tempo disponibel. Mi a combersa mas cu mi friends, mi a cuminsa planta y mi por a experimenta den cushina.
Con bo ta adaptando na e ‘new normal’?
Trankilo, pa awor nos tur tin cu siña biba cu ne. Importante ta pa nos mes cuida mas tanto cu ta posibel. Respeta e reglanan cu tin y respeta otro nan espacio. Uza handsanitizer cu pa awor ta nos ‘perfume’ nobo.
Por Like e Facebook page di Lizayra Tromp-Polak: Sra Virtual Aruba
