El a bin biba na Aruba pa eleva su horizontenan y den su momento el a sinti cu Aruba lo bay expande mas su conocemento di e mundo di biña y den su bida personal, el a sinti cu a inicia un etapa nobo, completamente distinto. Na Aruba Daniela ‘Dani’ Fernandez a traha como ‘sommelier’ na Tropical Bottling Company, e tabata hopi contento y riba tur cos gradici, unda el a forma parti di un team hopi profesional y dinamico, di cual el a siña hopi. Sin embargo Daniela a bolbe su pais natal, Argentina, pa inicia un rumbo completamente diferente cu no ta e industria di biña unda el a traha pa mas di diestres aña.
Momento cu Daniela a bolbe Buenos Aires hunto cu su pareha e pais tabata den su fase 1 di COVID-19, mientras cu Argentina tabata un di e prome paisnan den e region pa impone un lockdown estricto pa evita e propagacion di coronavirus. E ultimo noticia di e cantidad di caso ta cu e pais a yega na 268.574 contagio y 5.246 morto. Daniela tambe a pasa den e fase cu ta implica pa keda cera den cas y cuida nan mes di e crisis global di salud.
Pa locual ta su trabou actual e ta hunto cu su guy den un proyecto propio, cu awor nan ta wak como un oportunidad pa desaroya esaki. Nan a inicia un agencia di marketing enfoca mas den marketing digital. Actualmente Daniela ta realisando un formacion for di Spaña, cu ta un MBA y un Master en Marketing Digital y Comercio Electronico. Su pareha ta haci programacion y tambe tin su formacion como redactor. Algun tempo pasa el a termina un novela di ciencia ficcion.
Daniela tin hopi bunita recuerdo di Aruba y e ta bisa cu e ta cera su wowo y ta haya e sensacion di e beachnan bunita cu ta un soño. E temporada cu el a biba aki tabata un experiencia excelente den multiple aspecto. E ta hopi contento di por a conoce hendenan maraviyoso na Aruba. E ekipo di Tropical Bottling Co: Héctor Hernandez, Rowald, Mitch, Lizzi, Camila, Richard, Dr. Eli, Carlos Tapias, Alexander, Mirian, Shandeeh, Eddie de Veer y otro personanan excelente manera Rene Kan y Mariza Garcia. Daniela a encanta e bodeganan cu el a conoce y e actividadnan cu nan a desaroya. Aruba tabata un periodo hopi bunita tanto personal como profesional.
