E gobernador Cuomo a bisa awe cu e no ta prohibi ‘trick-or-treat’ na New York. “Mi no lo prohibi ‘trick or treaters’ pa bay di porta pa porta”, Cuomo a bisa na News12 Long Island. “Mi no ta kere ta apropia. Bo tin bisiña. Si bo kier bay bati na porta di bo bisiña, Dios bendiciona bo. Mi no ta bay bisa bo pa no hacie. Si bo kier haci un paseo cu bo yiu den e vecindario, mi no ta bay bisa cu bo no por hiba bo yiu keiro den e vecindario. Mi no ta bay haci esey”, el a agrega.
“Mi lo duna mi conseho y guia y despues bo ta tuma bo decision loke bo ta haci e anochi aki”. E declaracion ta bin un luna prome cu e celebracion, pero otro estadonan di e pais ya a prohibi e spirito memey di e pandemia di COVID-19. California’s Los Angeles County a cancela e fiestanan di Halloween siman pasa mencionando temor pa e virus, pero despues rapidamente a cambia e desicion y na su luga a recomenda pa e hendenan keda cas.
E oficina di Cuomo a bisa cu nan lo emiti un guia pa e practicanan sigur prome cu 31 di october, pero ya nan a duna luz berde na e labertinonan di maishi y ‘hayrides’, cu restriccionnan cu ta inclui capacidad reduci, rekisitonan di distanciamento social y tapaboca obligatorio. E porcentahe di infeccion den henter e estado di New York a mantene bou di 1 porciento pa e ultimo 38 dianan, segun e cifranan di Health Department di e estado cu a keda publica dialuna.
