E sentimento awe ora oficialmente a anuncia Lizayra Tromp-Polak como e ganadora di Señora Reina Virtual Internacional 2020, ta casi manera cu e no por a kere… E ta super feliz! “Nos a cuminsa fuerte y nos a cabe cu un ‘broche de oro’”: tabata e palabranan di nos Señora Reina Virtual Internacional 2020. E certamen aki tabata un experiencia diferente pa Lizayra, pa cuminsa e tabata dos luna largo y hopi intenso. Tur cos tabata virtual pero el a goza masha hopi. Y apesar cu nos isla ta pasando den momentonan dificil, e ta orguyoso di por a laga nos nomber resona riba un plataforma internacional.
Den e categoria di Lizayra, Aruba a keda na e prome luga den 3 di e prome 5 retonan. Cada rato cu nan sa cu nan tabata bay duna punto, e nervionan tabata bay halto. Aruba a sa di keda den Top 3 for di e prome retonan. E reto mas dificil pa Lizayra tabata e novela. E personahe di Bianca no tabata facil pa interpreta y pio na Spaño. Aunke e tin cu bisa, cu el a experencia un reto di reto, cu tabata e dia cu el a graba su video di gala. E dia ey pa un motibo of otro Lizayra a haya un alergia pisa y su cara no kier a wanta e makeup y e mester a graba. El a baha e trapi di Hyatt Place riba stilleto y sin por a wak, paso door di e alergia e no por a bisti su lens. E mas dibertido ta dia cu el a graba e video di introduccion. Cierto palabra Lizayra no por a pronuncia y el a bira e joke di full e certamen. Masha Pabien Lizayra Tromp-Polak cu bo titulo di Señora Reina Virtual Internacional 2020.
