Cu e ultimo desaroyonan pa loke ta trata e pandemia mundial di COVID-19, por ripara cu – manera ta posibel y cu tin e oportunidad presente- hopi persona ta trahando for di cas. Oficina di Turismo A.T.A. a mira oportunidad pa esunnan cu ta desea pa bishita nos destinacion y sigui traha for di nos isla pa un periodo mas largo y asina disfruta di nos isla mientras cu nan ta continuando cu nan trabou for di un distancia. Esaki riba su turno lo crea entrada pa nos negoshinan local y pa nos economia mientras cu e bishitante ta trahando. Di acuerdo cu e staff y team di mercadeo di A.T.A., e departamento A.C.B. (Aruba Convention Bureau) ta lidera e proyecto aki cu promocionnan pa medio di nan ‘business-to-business’ (B2B) database, pero alabes door di otro canalnan di mercadeo pa asina yega na e bishitantenan interesa den un workation na Aruba.
Actualmente e workation su promocion ta wordo mercadea na e mercado di Merca. Bishitantenan cu ta interesa por keda Aruba te cu un maximo di 90 dia y den futuro lo spera di por ofrece estadianan mas largo. Ta trahando riba esaki cu autoridadnan concerni. Intencion di e promocion aki ta pa ofrece paketenan atractivo pa un estadia prolonga den tres tipo di acomodacion cual ta: Hotel – Hotelnan cu cushina manera timeshare – Otro acomodacionnan manera condo’s y casnan yama ‘vacation rental villas’.
Desde cu e promocion aki a wordo lansa por bisa cu el a haya hopi bon acohida den e mercado di Merca unda hasta famianan ta mira un oportunidad pa sali for di nan pais y bishita nos isla pa un tempo prolonga. Mester menciona cu e bishitante Mericano ta pasa door di diferente protocol prome cu nan por bishita nos isla, pero cu tur ta bisa cu e ta ‘bale la pena’ pasobra – apesar di e reto pa cu loke e pandemia di COVID-19 ta trece cu ne, nan ta sinti nan mes sigur na Aruba. Mescos cu otro destinacionnan, nos isla ta pasando den momentonan di reto pa loke ta trata e pandemia aki. Ta importante pa nos tur sigui e protocolnan manera stipula door di diferente instancianan. Hunto nos lo vence y nos isla su economia y su turismo lo sigui florece.
