Den luna di augustus 2020 Cosecha a celebra nan 5 aña aniversario y pa esey mes como celebracion a lansa un campaña diahuebs dia 24 di september 2020. Mirando e situacion actual di Covid-19 unda cu nos tur no por ta hunto manera norma,l e campaña aki ta uno cu sigur por participa sin preocupación. Cosecha ta busca e “IT product” y e focus di e campaña aki ta pa asina stimula nos artista y artesano pa por bin cu un producto artesanal unico y autentico. Na unda nan por diseña y traha riba un producto innovativo, y naturalmente “challenge” nan mes. Claro si bo no ta un artista of artesano pero si un persona creativo, esaki ta bo oportunidad pa bo tambe por mustra bo talento.
Por pensa riba por ehempel ceramica, acesorio, lampi, piesanan pa decoracion, productonan innovativo pa sea e ser masculino of femenino y mas. E idea ta pa por traha riba un pieza na cas mes. Principalmente den e temporada aki no mester lubida con importante creatividad ta den nos bida diario.
E REKESITONAN PA PARTICIPA TA LO SIGUIENTE:
- Mester ta original y no tin e SEYO nacional di artesania ainda
- Mester ta inspira door di Aruba su naturalesa, storianan, historia y cultura
- Mester ta acompaña pa un storia di e inspiracion y e concepto di e producto
- Mester ta traha na man of cu tools simpel of machinnan cu por wordo opera na man
- Tin un bon acabado
- Tin un balor comercial
- Por wordo replica
- Mester por domina e material cu e producto ta traha di dje
- Mester tin un WOW factor
Ta importante pa menciona cu pa e campaña aki no por uza: kwihi, cocolishi y matanan protegi.
Participantenan tin te cu dia 16 di november pa por entrega un producto y lo bay tin workshops pa e participantenan durante e periodo di october y november.
Pa participa mester haci registracion via e link aki: http://www.arubacosecha.com/it-challenge cu por haya riba e website di Cosecha y tambe riba nan Facebook page. Dia 20 di november lo saca e ganador y lo ricibi un photoshoot special, promocion nacional y internacional, un special “display” den tienda di Cosecha, SEYO di artesania y Cosecha lo cumpra un coleccion exclusivo di e ganador. Ta saca un ganador memey di tur participante, pero participando ya bo ta un ganador door di kere den bo mes y stimula bo mes pa por yega na un producto final. Tuma e temporada aki cu nos ta mas na cas como un empuhe pa bo por traha riba bo “IT product” y distrai bo mes pa ta mas creativo, inspira y participa na e grandioso campaña aki. Un yamada na un y tur cu tin un idea pa participa na e campaña innovativo aki na unda tin e oportunidad pa diseña, craft y reta bo mes.
