“Dios no ta duna bo un cruz cu bo no por carga”
Durante e dia di awe diferente compania nan empleadonan a bisti ros, mustrando di ta solidario cu e hende muhenan cu ta luchando cu cancer di pecho. Segun National Breast Cancer Foundation na Merca cu ta diagnostica un hende muhe cu cancer di pecho cada dos minuut. E innovacionnan den investigacion, opcionnan kirurgico y pruebanan clinico ta brinda e hende muhenan mas opcion. Cu e deteccion tempran, e porcentahe di supervivencia ta aumenta, p’esey chekeo propio di e pechonan na cas ta hopi importante!
Nos ta trece bek un entrevista cu Roxana Effer, cu sin duda ta un inspiracion pa hopi hende muhe cu ta luchando cu e enfermedad di cancer. El a confronta y surpasa cancer tres biaha, siñando hopi pasando den e enfermedad aki y cada bes ta un experiencia diferente. E prome biaha cu el a keda detecta cu cancer di pecho tabata net 2 siman prome cu el a haci 25 aña na 2009. Asina tambe el a bira e hende muhe di mas jong (e tempo ey) na Aruba cu cancer di pecho registra. E di dos cancer a sali na e mesun pecho riba e cuero, cu consecuencia cu mester a kita full e pecho banda robes. Despues na 2016 atrobe Roxana a hay’e confronta cu cancer, y e biaha aki na su garganta, unda a saca 89 klier y gran parti di e musculonan di su nek.
Roxana a opera na Aruba mes door di dokter Peterson y despues a mand’e Baranquilla, Colombia. Esaki tabata cu e intencion di haya bestraling y cuminsa di biaha cu kimoterapia, pero a resulta cu mester a bolbe oper’e na Colombia, y el a pasa casi 5 luna eynan. El a bay un tiki mas trankil, paso ya e tabata sa tur kico ta bin. Sinembargo tabata un poco diferente, paso garganta ta un otro proceso. E no por a drumi bon door cu e operacion tabata molesti’e, y e mester a cana cu un ‘drain’ na su nek durante un siman.
SU META PA SIGUI LUCHA
E mester a bay haci tambe terapia pa nek, brasa y cara, paso mitar di su cara a bay den banda, ora el a opera na Aruba. Esey tabata algo teribel p’e. Su wowo no tabata cera bon di un banda y e no por a hari bon cu su boca, pero despues el a siña kico tur e mester a haci cu su cara pa e logra haya 90% bek. E distancia cu Roxana tabatin di su yiunan tabata dun’e mas forsa p’e recupera y bolbe Aruba. E ta gradici e tata di su yiunan y su ruman homber, cu a haci turno pa bay Colombia wak p’e. E ta gradici tambe su famia cu ta biba na Colombia, cu tabata bin tambe haci turno pa wak p’e y lanta su animo pa sigui dilanti.
Un reaccion cu Roxana ta corda te dia di awe ta momento cu un señora, cu a wak e na un supermercado, a bira bis’e:”Juffrouw ta esun cu a sali den FOCUS toch?”. Roxana a contesta: “Siii!”. E señora a bis’e, cu e no a yega di wak un hende cu tanto positivismo y alegria pa sigui bay dilanti despues di pasa den asina tanto cos. E palabranan ey, a sigura Roxana Effer cu loke e ta refleha, tur hende ta wak y ta berdad cu e ta wak tur cos di otro manera. E ta busca semper e banda positivo di tur cos! Esey e kier tur hende wak den bida, aunke e ta duro berdad, pero ta dushi pa sinti e biento, solo, lama y naturalesa. E ta encanta cu e ta bibo! Su meta pa sigui lucha, pa e por wak su yiunan crece y cu nan por cana riba nan mes.
HACIENDO TUR LOKE E TA ENCANTA
Roxana a sali tres biaha den revista FOCUS y e tin cada bes mas di conta di su mes y gusta comparti su storia cu otro hende. E gusta cu e hendenan ta puntr’e y pa e responde tur nan dudanan. Durante e añanan cu a pasa Roxana Effer a pone su mes pa haci tur loke e ta encanta. El a canta den gaita, modela y aña pasa el a competi pa Señora Carnaval, representando Infinity Carnaval Group. El a conta su storia den programanan na radio y television, el a sali tambe riba e portada di revista Bacchanal y su potret ta grandi poni den Carnival Euphoria. Ultimamente Roxana ta hopi activo tambe compartiendo su creatividad y talento cu su siguidornan riba TikTok cu su videonan unico. Roxana ta sigui gradici Dios pa cada dia: “Dios no ta duna bo un cruz cu bo no por carga”.
