Dos aña despues di e boda real de Meghan Markle y prins Harry, ta bin sali awo na claridad cu George y Amal Clooney no tabata invita formalmente na e bruid. E actor di Hollywood y e abogado di derechonan humano tabata entre e 600 invitadonan cu a presencia e enlace di Harry y Meghan den St George’s Chapel, Windsor Castle na mei 2018. E pareha tabata entre e varios celebridadnan di Hollywood cu a desfila rumbo pa e kapel pero te cu e dia ey nunca antes nan a yega di topa cu e pareha real na niun otro luga.
Prinses Diana y Lady Carolyn na bruid di un amiga na 1991 
Carolyn Bartholomew y su casa na un bruid na 2004
Tin un storia ta circulando cu mientras Lady Carolyn Bartholomew, ex-huisgenoot di prinses Diana, tabata sperando pa e misa inicia, el a bira puntra e pareha cu tabata band’i dje sinta di unda nan conoce Meghan y Harry, y e contesta tabata cu nan no tabata conoce nan. E contesta tabata inespera segun Rachel Johnson, ruman di e prome ministro britanico Boris Johnson, den un entrevista cu AirMail. Carolyn, cu a atende e boda hunto su casa William, ta e madrina di Harry y tabata un di e tres mucha muhernan jong cu a comparti Earl’s Court flat cu Diana y tabata sa di e secreto ora el a conoce Charles.
Durante e ceremonia religioso, e famoso actor y abogado tabatin e luganan di honor hunto cu Lady Carolyn y su casa, vizconde Linley, yiu di prinses Margaret, tambe Oprah, Serena Williams y su casa Alexis Ohanian, mientras cu David y Victoria Beckham tabatin luganan mas leu. A pesar di no tabatin niun relacion entre pareha Clooney y e famia real, nan tabata tambe riba e lista VIP di 200 invitado na e recepcion na Frogmore House. Hasta segun algun columna social cu George Clooney a baila cu Meghan y su cuña Kate Middleton.
Pero awor e pregunta a surgi for di unda nan a haya e invitacion? Aunke no tin e siguridad con nan a yega e celebracion, Rachel Johnson ta pensa cu George y Amal por tabata e invitadonan di David y Victoria Beckham, of incluso di Oprah Winfrey of di James Corden, cu tampoco no tabata gran amigonan di e pareha prome cu e boda real. P’esey ta keda e gran duda ta ken a orkesta e invitacion aki.
