Siman pasa Kim Kardashian a cumpli 40 aña y diamars e siman aki el a publica riba su rednan social, e potretnan di su ‘celebracion humilde’. E potretnan cu Kim Kardashian a post a trece masha hopi critica pa organisa un fiesta luhoso. E hendenan a haya e potretnan sin sensibilidad, teniendo na cuenta cu Merca ta e pais cu tin mas morto door di COVID-19. Un di e personanan cu a critica Kim ta e cantante britanico Peter Frampton cu a bisa: “Bo ta asina sin sensibilidad cu bo no ta tuma na cuenta cu esaki no ta loke mayoria di hende kier scucha durante e pio ‘peak’ di e pandemia? E hendenan ta bayendo ‘food banks’, no e islanan priva”.
Kim Kardashian West a organisa un fiesta luhoso pa celebra su cumpleaño hunto cu su famia y un grupo di amigo, sin distanciamento social ni tapapoca memey di un pandemia. Kim tambe a wordo critica debi cu e ta blof riba social media cu e tabatin su fiesta. Entre e tantisimo critica tabatin tambe di Jenna Quigley, cu a bisa: “Fantastico, tin hendenan mester a dispidi di nan ser keri via telefon mientras nan tabata muriendo na hospital. Pero bon cos pa bo publica riba bo social media mientras full e mundo ta sufriendo. Bo ta asina ‘humble and down to earth’ di berdad”.
