Iritacion, acne of rash riba e cuero? Esakinan ta algun efecto secundario cu un hende por haya door di e uzo di tapaboca, p’esey aki ta sigui algun recomendacion pa evita cu esaki por pasa. Loke nos tabata wak prome den e peliculanan di science fiction, awo ta parti di nos realidad diario. Sali di cas cu bo tapaboca hunto cu bo, pa proteha bo mes ora bo yega na un luga, a bira un obligacion y responsabilidad di tur hende. Uzando un tapaboca probablemente bo a descubri e efecto secundario, cu ta hopi incomodo pa mantene bo nanishi y boca tapa durante un periodo basta largo, cu por causa huiduitslag, puishi y cuero seco.
Pero dicon tin un daño na e cuero cu e uzo di tapaboca? E masker ta causa un efecto oclusivo, mas tanto na e zonanan cu tin contacto cu e cuero door cu e no mishi cu henter e cara. E zonanan cu e ta mishi ta na e cachete, nanishi, onderkaak y cerca di e horeanan, of na tur e puntonan di contacto cu ta oclusivo door di e tapaboca. E efectonan fisico ta produci cu e poro no ta respira bon generando e ora acne of huiduitslag.
Segun e dermatologonan e material di un tapaboca tambe ta un factor, cu por ocasiona cu e cuero ta mas of menos sensitivo na un iritacion. Por ehempel, e tapabocanan cu ta traha cu e materialnan kirurgico of cu tela di catuna, ta esnan cu ta provoca menos e tipo di e efectonan aki. Pero e maskernan traha di cierto tipo di tela sintetico manera neoprene of deriva di neoprene, por causa mas iritacion na e cuero.
E dermatologonan ta sugeri pa uza e tapabocanan KN95 door di e materialnan cu nan a wordo traha y paso nan ta esnan cu tin menos zona cu ta mishi cu e cuero. Si bo no tin e tipo aki, e ora miho uza e masker kirurgico clasico di cuatro capa. Na esunnan cu a traha nan propio tapaboca, ta recomendabel pa uza catuna of trata pa e tela ta mas natural posibel, pero si ta una tela cu e luz ta demasiado transparent, e ora no ta recomendabel pa nos proteccion.
Ki ta haci den caso cu e tapaboca ta provoca daño na e cuero? Cu daño of sin daño, e idea ta pa e cuero ta semper limpi ora ta uza e tapaboca, si tin makiyahe of e cuero tin mas vet cu normal, e ora tin e chens cu tin un blokeo di e poronan y ta genera algun tipo di problema manera acne, p’esey ta miho e ora pa evita uza makiyahe. Un otro tip ta pa na tur momento hidrata e cuero, ya sea cu e ta mixto, seco of vet, vooral despues di a laba e cara. Ora uza hidratante ta manera cu ta poniendo un escudo protector pa e tapaboca no rasca cu e cuero, esaki ta un forma di preveni iritacion of huiduitslag. Un punto importante ta pa uza un protector labial pasobra esaki por seca y split ora ta uza tapaboca hopi, ya cu tin un aumento den e temperatura cu ta genera humedad ora e awa di nos cuero ta evapora.
