E tabata un shock pa hopi hende, ora ayera nan a haya sa di e noticia tristo cu Renny Laclé (59) a fayece, despues di a confronta problema cu su salud pa algun aña. El a bay un tempo Hulanda pa sigui su tratamentonan y despues a bolbe Aruba, unda e ta stima y aprecia pa masha hopi hende. Esaki a resalta tambe ayera nochi unda mesora cu e noticia di su fayecimento a bira conoci, por a mira un cantidad di post unda a comparti bunita recuerdonan di Renny Laclé. Su amor y dedicacion na Aruba su cultura, resaltando su trabou inmenso den diferente organisacion, y tabata un persona clave den diferente grupo di carnaval, unda su creatividad no tabatin limite. Den e mundo di beyesa Renny a dedica hopi tempo y na Star Promotion y como national director el a asisti na diferente certamen di beyesa internacional, pa duna semper su sosten na e representantenan di Aruba.
Un persona hopi cerca di Renny tabata Anoutcka Koolman-Burleson, kende cu hopi tristesa a conta di e momentonan di alegria cu nan a comparti den e ultimo certamen di Miss Universe. Anoutcka ta describi Renny Laclé como un persona keto y cu un curason sincero. E tabatin e deseo y amor ferviente pa logra trece e triunfo den mundo di beyesa pa su pais Aruba. Aña pasa na Atlanta, Renny a gradici Dios, cu e por a scucha hunto Anoutcka for di boca di Paula Stuggart, directora di Miss Universe Organization, y tambe di Carlos Fernandes, kende ta e persona cu ta maneha e frankisia di e paisnan pa e organisacion, cu Aruba a haci un tremendo trabou cu Danna Garcia. E conseho cu nan a haya tabata pa nan sigui traha den e mesun forma, y cu muy pronto nan lo wak fruta di nan trabou.
Recordando un momento hopi significativo pa Renny y loke nan a comparti na Atlanta aña pasa durante e certamen di Miss Universe, Anoutcka a sigui recordando awe contando: “Sra Paula Stuggart a bisa nos sigui uni y el a permiti nos como un di e poco paisnan di tur cu tabata presente pa saca potret cu ne. E anochi ey hunto nos a regresa hotel y Renny a sali feliz y radiante for di e cocktail party. E tabata sa cu nan tabata contento cu su trabou como national director y el a gradici mi pa e logro ey. P’e tabata un reconocimento cu nunca antes… den e ultimo añanan como national director nan a bis’e asina personal y directamente. Pa mi awe mi ta wak e momento ey como un reconocimento na bida pa tur su esfuersonan den mundo di beyesa. Y mi ta gradici Dios cu mi por tabata testigo di esaki. Renny manera Paula a bisa nos: She did a good job. You can be proud. Just stay together and soon you will reach the crown”.
