Suecia a admiti cu nan no ta wak niun señal cu e inmunidad colectivo (herd immunity) ta disminuyendo e propagacion di Covid-19, mirando cu e cantidad di e infeccionnan nobo ta subiendo. E pais nordico, cu su enfoke pa aborda e pandemia a atrae atencion mundial, a registra 17.265 caso nobo desde diabierna, segun su Health Agency a informa awe. E aumento den comparacion cu 15.084 caso nobo registra durante e periodo corespondiente di siman pasa, e pashentnan cu coronavirus cu ta wordo interna den e hospitalnan ta casi duplicando cada siman na Suecia.
E indice di mortalidad per capita di Suecia ta varios biaha mas halto cu su bisiñanan nordico, pero mas abou cu algun di e paisnan Europeo mas grandi. E noticia a sali ora cu e organismo di control di salud di Suecia a emiti un condena fuerte pa e forma con e hendenan grandi a wordo trata den e casnan di anciano durante e pandemia di coronavirus, y a señala cu algun pashent a ser laga tira pa muri sin un examen medico. E casnan di anciano a keda teriblemente afecta den e prome ola di coronavirus, loke a haci cu na mei e prome ministro, Stefan Lofven, a admiti si e pais a faya den proteha su ancianonan.
