E comision di SEYO nacional a haci un evaluacion di e 17 piesanan entrega, y dia 17 di november a revela e 10 finalistanan pa e evento final IT Challenge cu a tuma luga dia 23 di november den Cas di Cultura. Esunnan cu a forma parti di e hurado tabata Alice van Romondt, Jodi Tobman, Frank Croes, Diantha Boekhouwer, Talitha Schouten y Vicky Arens Presidente di hurado sin derecho di voto. Sin duda algun nan tabatin un tarea dificil pero a logra na saca e 3 ganadornan.
Piesa Divita Lia MAldonado
Nan a pone enfasis riba e siguiente puntonan:
E piesa mester ta uno original cu no a ricibi un SEYO di artesania ainda, inspira door di nos naturalesa, storia, historia y cultura. Tambe e participantenan mester a entrega un storia di nan inspiracion y e concepto. E por ta traha cu tools simpel of cu e mashinnan cu ta opera na man. Mester tin un acabado bunita y mester a uza e material adecuado y domina e material. Un punto hopi importante tambe ta cu e mester tin un balor comercial y mester por wordo replica pa por traha un coleccion. Y como e delaster punto e mester tin e factor WOW!
1 finalista Freddy Ramirez
E anochi aki a pasa video di e participantenan, tambe a splica mas di e piesa y e huradonan tabatin e oportunidad pa por haci nan preguntanan. E di dos finalista a keda den persona di Michella van Loon cu su piesa Oruma, e prome finalista tabata Freddy Ramirez cu su piesa Birds eye View y e ganador absoluto a keda den persona di Lidia Maldonado miho conoci como Lia cu su piesa yama Divita.
Ganador absoluto Lidia Maldonado
E anochi tabata uno diferente y culminante cu MC Joanne Dirksz directora di Cosecha y Leonardo Phillips cu no ta desconoci den e mundo di arte. Un sala completamente yen manteniendo nan mes na e protocol di Covid-19 di Cas di Cultura y cu hasta bo ta wordo asigna na bo asiento. Door cu tabata tin menos luga pa sinta tambe, a opta pa pasa e anochi aki live riba e Facebook page di Cosecha. Por bishita e paginanan di social media pa admira e piesanan y tambe por wak e videonan di e participantenan. Pa mas informacion por tuma contacto cu Cosecha Oranjestad na telefoon 5878709. Tambe por manda un email na [email protected].Pa por keda informa di Cosecha su workshop-, artesano- y artistanan, y pa nan webshop nobo por bishita nan Facebook page: Aruba-Cosecha Instagram page: cosecha_aruba y Webpage: www.arubacosecha.com
