Vanessa Bryant, casa di e fayecido Kobe Bryant, a ser demanda pa su propio mama. Sofia Urbieta ta exigi legalmente un compensacion economico, pa di e manera aki nan reconoce e añanan, cu el a traha como asistente y nanny di famia Bryant sin niun compensacion. Di acuerdo cu e datonan obteni pa e revista People na e corte di Orange County, na California, Sofia a sigura cu prome cu Kobe Bryant a muri, el a priminti di cuida su suegra pa resto di su bida. “Desafortunadamente, e promesanan di Kobe Bryant no a wak luz pasobra el a fayece y Vanessa Bryant a tuma tur y cada un di e pasonan pa anula y cancela tur e promesanan cu Kobe Bryant a haci na Sofia Urbieta. Vanessa Bryant no tabatin e intencion di honra niun di e acuerdo- ni e promesanan di Bryant niun momento”, asina ta skirbi den e documento.
Cu e demanda y acusacionnan di su propio mama, Vanessa Bryant a dicidi pa no keda keto y el a manda un comunicado pa People den cual e ta fiha su postura tocante e asunto, y a acusa su mama di kier obtene un ganashi financiero di su famia. “Mi mama ta sigui tratando di haya e formanan di obtene un ganashi financiero inespera di nos famia. Mi a apoy’e durante casi 20 aña y nunca e tabata mi asistente personal ni di Kobe ni nanny. Semper mi tabata un mama cu ta na cas y mi casa y ami tabata cuida nos yiunan tur tempo”. Den e documento, Vanessa Bryant ta asegura cu su mama tabata biba den e propiedadnan di e famia durante dos decada, pasobra e no tabatin placa pa cumpra su propio cas despues di su divorcio.
Sofia Urbieta tabata cuida e nietanan de bes en cuando, manera mayoria di e welonan ta haci. E no tabata ocupa di e asuntonan comercial of gastonan. E tabata un wela cu tabata wordo mantene pa Vanessa Bryant y su yerno riba e peticion di Vanessa. “Awor e kier cobra mi 96 dollar pa ora pa supuestamente traha 12 ora pa dia durante 18 aña pa cuida su nietanan”, Vanessa Bryant ta sigura den su comunicado. Vanessa a recorda tambe e entrevista cu Sofia a haci na Univision, unda el a desprecia nan famia y el a haci acusacionnan falso. Apesar di esey Vanessa ta bisa cu e tabata dispuesto pa apoya su mama dunand’e un mensualidad pa e resto di su bida. En cambio Sofia Urbienta a bin den contacto cu Vanessa Bryant a traves di intermediario y el a exigi 5 miyon di dollar, un cas y un Mercedes Benz. Finalmente, Vanessa a bisa cu e demanda ta hopi bergonsoso y inimaginabelmente doloroso. Cu su mama no ta ripara con hopi e ta afecta su propio yiu y su nietanan.
