E actriz, Jessie Cave, cu ta esun encarga pa duna bida na e personahe di Lavender Brown den ‘Harry Potter’, ta feliz y el a comparti cu su siguidonan di Instagram, e miho noticia cu e por a ricibi pa duna bonbini na 2021, despues cu su baby Abraham ‘Bam’ Benjamin a ser diagnostica cu Covid-19. E baby di tres luna a libra di e bataya duro y afortunadamente el a sali triunfante manera cu su mama a informa a traves di IG, unda el a post un mensahe di gratitud paso su yiu a logra supera Covid-19 y ya e ta na cas. El a mustra tambe agradecido pa e ekipo medico cu a yud’e.
E yegada di Abraham, segun e propio Jessie, tabata hopi diferente na su dos rumannan, Donnie, di 6 aña, y Margot, di 4. E tabatin un parto hopi dificil, algo cu el a comparti tambe dia 22 di october riba su rednan social: “Nos baby a nace den e prome oranan di ayera mainta. Solamente 40 minuut despues cu e awa di yiu a kibra. Un poco extremo, pero tambe lo tabata e skopnan durante e embaraso! Esaki tabata un experiencia hopi diferente na mi dos prome nacimentonan. Mucho mas erg y for di control”, ta parti di e post riba Jessie Cave su IG.
E actriz su yiu a ser hospitalisa cu COVID-19 ora e tabatin 11 siman y el a comparti e noticia cu e baby ta OK y ta bayendo bon, pero nan ta alerto y cauteloso. Jessie tabatin e confiansa den e balentia di e baby pa sa cu e lo supera cualkier prueba y el a mustra esaki: “Actualmente nos ta den e unidad neonatal, pero e ta un mucha fuerte y esaki ta e luga mas sigur p’e na e momento aki”, el a post riba IG. E actriz di 33 aña a gradici tur e bon deseonan y mensahenan di apoyo. E mensahe a ser acompaña pa un serie di potret di dje y su baby.
