Na Adelaide e miho tenistanan di mundo lo ta den cuarentena, unda nan lo hunga un torneo de exhibicion prome cu nan biaha pa Melbourne pa Australian Open, e organisadornan a informa awe. E number uno di mundo, Novak Djokovic, Rafael Nadal y e 23 biaha campeon di Grand Slam, Serena Williams, lo ta den e serie di streanan di deporte, cu lo bay den cuarentena na Adelaide prome cu nan hunga e torneo di exhibicion dia 29 di januari, cu ta e apertura di e zomer australiano di tenis di 2021.
Door di e pandemia di Covid-19, cu ta afecta e reanudacion di e temporada 2021 di tenis, Australian Open a keda aplasa pa tres siman, y lo tuma luga di 8 pa 21 di februari. Melbourne a sali na october for di un periodo di lockdown di varios luna, despues di e segundo ola di Covid-19, loke a complica e planificacion di e torneo aki di Grand Slam. E hungadonan y nan colaboradornan tin cu yega fin di otro siman na Melbourne, unda nan mester respeta un cuarentena di 14 dia prome cu e torneo.
Pero e capacidad hotelero reduci di e ciudad a obliga e director di Australian Open, Craig Tiley, pa pidi ayudo di e gobierno di estado di Australia Meridional, unda Adelaide ta keda. Mientrastanto e propietarionan di e apartamentonan na Westin Melbourne ta preocupa pa nan salud y nunca lo acepta pa e hungadonan internacional keda den cuarentena den e hotel, nan abogado a bisa na Reuters dialuna ultimo. E propietarionan cu ta inlcui algun top empresario di e pais, a bisa di sinti nan ataca di sorpresa pa e plan di cuarentena.
