Durante e temporada di Fin di Aña, Organisacion Women empOwering Women (WOW) a colabora cu e diseñador grafico local, Josi Coutinho, pa crea e ‘Empowering Christmas Cards Project’. E proyecto aki a consisti di 4 ‘christmas cards’ cu e mensahenan di inspiracion pa empodera e hende muhe. A lansa e carchinan na benta durante e luna di december, pa asina recauda fondo pa Ortopedagogisch Centrum. E miembronan di e comite a escoge e organisacion aki como cu e ta brinda asistencia na e hobennan.
Ortopedagogisch Centrum ta un centro cu ta ofrece tratamento y guia na e hobennan cu problematica psicosocial, unda cu den un termino corto por siña e habilidadnan necesario riba diferente area di desaroyo, y asina funciona na un manera independiente y adecua den nos comunidad. E centro aki ta enfoca riba engrandece e habilidadnan di e hoben, yudando e hoben alcansa e metanan importante den su desaroyo. Trayectoria di guia ta den faceta pa asina gradualmente trece cambio den conducta unda cu na final e hoben ta cla pa funciona den un manera independiente den seno familiar y den nos comunidad.
Head of Communications, Rocío Burgos hunto cu Head of Empowerment, Kareline van der Linden, a haci entrega di e donacion na Director Dynia Abath-Muller di AWG. 1000,- den forma di ‘gift cards’ di Dyon Center pa material pa nan proyectonan y actividad diario hunto cu e hobennan.
Organisacion Women empOwering Women ta desea di extende palabra di gratitud na tur esunnan cu a cumpra e carchinan y asina contribui na e bunita causa aki. Na banda di esaki, a haci un donacion na Fundacion Hende Muher den Dificultad y Tienermoeders Huis Aruba. E donacion tabata pa felicita e organisacionnan aki cu ta traha riba e formacion di hende muhe den nos comunidad. Nan ta encurasha mas organisacion den nos comunidad pa acerca instancianan y asina brinda apoyo y sosten den e temporada aki yena cu reto.
