Tessica Brown di 40 aña, a comparti pa prome biaha riba TikTok su situacion dificil door di a aplica Gorilla Glue Spray Adhesive Heavy Duty den su cabey, ora cu el a keda sin e hairspray cu e ta uza normalmente. Brown cu ta biba na Louisana, ken su video a bay viral door di a uza Gorilla Glue na luga di hairspray, ta recuperando di una cirugia pa kita e lijm for di su cuero di cabes. Brown su manager, Gina Rodriguez, a conta na Entertainment Tonight cu e ciruhano plastico, Dr. Michael Obeng, a logra elimina tur e ‘Gorilla Glue’ for di e cabey di Tessica.
Actualmente e ta descansando y recuperando di e teribel experencia, Rodríguez a bisa den e entrevista. “Manera boso por imagina, Tessica su cuero di cabes ta extremadamente sensibel na e momentonan aki y mester un poco mas di tempo pa recupera”. Den e video, el a splica cu e no por a move su cabey durante ‘un luna’. Brown a ripara cu aplicando e spray di Gorilla Glue tabata hopi mal mes. El a laba su cabey 15 biaha y asina mes niun drachi tabata move.
Gorilla Glue ta un lijm heavy-duty di multiple uzo y diseña pa pega material manera palo, metal, tela, foam, plastic, papel, glas y mucho mas. Gorilla Snot Gel, sin embargo, ta un producto separa, cu un duracion mas largo pa e cabey humano. Despues di a purba varios biaha na su cas, y no por a logra kita e lijm for di su cabey, finalmente e mester a bay eerste hulp pa busca atencion medico. Sin embargo, nan a mande cas cu awa sterilisa y MediChoice Nail Remover Pads pa e mes uza.
Un ‘silver lining’ a aparece pa Tessica Brown, ora cu Dr. Obeng, cu ta biba na Los Angeles, a mira su lucha online y el a acerc’e pa bise, cu e por kita e lijm cu un tratamento kimico special, segun un informe di CBS News. E cirugia ta costa mas di $ 12,000, pero Obeng a ofrece pa hacie gratis. Brown a bay Los Angeles na comienso di e siman aki pa somete na e procedura. Dr. Obeng a bisa cu e lo pasa e proxmo dos pa tres luna recuperando di e operacion. Na inicio di su teribel experencia, Brown a crea un pagina di GoFundMe pa recauda donacion pa yude paga e tratamentonan medico necesario pa drecha su cabey cu un meta di $ 1,500. GoFundMe a logra su meta y a supera su obhetivo recaudando $ 20,525.
