E actor Nicolas Cage di 56 aña, a casa pa di cinco biaha y su esposa nobo yama Riko Shibata y tin 26 aña, durante un ceremonia intimo, segun e actor a confirma na Daily Mail, cu a haya e potretnan di e ceremonia unda tabata presente su ex-casa y su yiu homber. E ‘low profile wedding’ a tuma luga na Wynn Las Vegas Resort and Country Club dia 16 di februari, fecha special pa e novio pasobra tabata dia di su fecha natal y di su defunto tata, p’esey e kier a honr’e cu e matrimonio sorpresivo cu Shibata.
E novia a bisti un Kimono Nupcial Hapones preto di Kyoto traha na man cu ta rekeri tres capa, y sandalia cu toke cora (color di felicidad) y meanan blanco. Den su man e tabatin un bouquet di rosa geel y cora cu a compensa su lipstick cora briyante, mientras su cabey largo preto scur el a laga habri cayendo riba su schoudernan. Cage a bisti un tuxedo preto di Tom Ford y un boutonniere di un rosa geel pa match cu e bouquet di Riko. E bruid a cana riba su cancion faborito ‘Winter Song’ di Kiroro, prome cu nan a intercambia e promesanan tradicional Catolico y Shinto.
E pareha a conoce otro un aña pasa na Shiga, Hapon y e prome biaha cu a mira nan hunto tabata na februari aña pasa na New Orleans. E luna siguiente nan a ser mira bek na New York, y Nicolas Cage a anuncia nan compromiso den un entrevista na radio den e programa de su ruman Marc Coppola na augustus: “El a bay di New York y bolbe Kioto, Hapon, y mi a bolbe Nevada y mi no a wak e den 6 luna. “Nos ta feliz hunto y emociona di pasa tempo hunto, y a yega un momento cu mi a bise: ”Mira, mi kier casa cu bo y nos a compromete atraves di FaceTime. Mi a cumpra un renchi di daimante preto y oro, y a personalise y mande p’e cu FedEx”, Nicolas a conta durante e entrevista cu su ruman.
