E actriz y presentadora, Adamari Lopez, a sorprende su siguidonan y e publico di e programa ‘Hoy dia’ cu su impresionante transformacion fisico, cu el a logra a base di hopi esfuerso y training duro cu e tabata documenta a traves di su rednan social. Desde ya varios aña cu Adamari a enfrenta un lucha contra sobrepeso y awor el a mustra con cu hopi disciplina bo por logra loke bo ta propone. Na 2005 e actriz a revela cu el a ser diagnostica cu cancer na pecho y aña pasa el a papia tocante su problemanan di peso cu el a enfrenta despues di e enfermedad.
Un poco mas cu un aña pasa cu e actriz ‘puertorriqueña’ a converti den e embajadora di Weight Watchers, su prome paso pa cuminsa come miho pa ta mas saludabel y pa baha e kilonan di mas riba su curpa. Ademas el a cuminsa un rutina di ehercicio guia pa un entrenador, y semper cu e apoyo di su pareha, cu ken incluso e tabata haci rutina di baile cu tabata yude soda y sigui enfoca den su mision pa baha peso. Tabata hopi luna di sacrificio y cu a duna Adamari un resultado increibel, cu por a mira riba e potretnan cu a ser comparti riba Instagram di Hoy dia (Telemundo).
Cu su figura nobo, Adamari Lopez ta duna un buelta completo na su estilo. Awor e ta bisti e pañanan mas pega na su curpa y silueta mas moderno. Su looks ta awor tambe mas colorido, cu ta lag’e mustra mas jong. El a comparti tambe den un entrevista cu ora e wak e cambio den su pañanan, cu e sizenan cu e tabata bisti compara cu awor ta un gran diferencia.
