Si bo ta kere of no, pero un relacion ta causa hopi esfuerso mental, esaki segun e experto den relacion, Susan Winters, cu ta autor di bestsellers. E ta bisa: “Un relacion intimo ta ocupa hopi espacio den nos cabes. Aunke un parti grandi di esaki ta sosode inconscientemente, simplemente un persona tin menos capacidad pa enfoca riba su mes, ora e ta den un relacion”.
Mrs. Winters ta referi na e tempo cu e hendenan den un relacion ta pasa sin nan kier, ta preocupa nan mes pa nan pareha, y pensando hopi riba e peleanan chikito. E ta bisa cu e sortonan di stress aki por impedi e persona su felicidad. “E discordia emocional por consumi tur cos, ya cu e ta aleha nos di e momento y situacion presente”. Na contrario, e ta bisa cu ora bo ta soltero, bo tin e chens pa ordena e desordo den bo cabes, y bo ta haci espacio pa e pensamento- y e soñonan nobo.
Bo ta mas ‘open’ na loke bida ta pone den bo caminda
E expertonan ta bisa cu un persona soltero ta mas dispuesto pa atende cu e situacionnan inespera. “Ta casi manera nan no tabatin otro opcion”, segun dokter Niloo Dardasthi, cu ta un psicologo y experto den relacion. E ta bisa cu ora bo ta soltero, automaticamente bo mester bira autosuficiente. Liber di e limitacionnan di tin un pareha, e bida di e persona soltero ta bira completamente di dje, segun dokter Dardashti. No tin niun hende cu ta stop bo pa sali persigui bo ambicionnan.
Bo tin mas tempo pa ‘get in touch’ cu bo mes
Dokter Dardashti ta relata cu hopi biaha e hendenan ta bisa, cu ora nan ta den un relacion, nan ta sinti cu nan a perde nan mes. Esey ta pasa door cu nos no ta haci e cosnan riba nos mes.
Den e relacionnan, e personanan ta core riesgo di perde contacto cu nan mes, paso nan tin menos tempo pa nan por concentra riba nan mesun desaroyo personal. “Ora bo ta soltero, bo ta crea e oportunidad pa tin mas contacto cu e parti interior di bo”. Dr. Dardashti ta agrega cu un keho comun cu e ta scucha di su pashentnan ta, cu nan ta sinti los fo’i parti creativo. E ta bisa ora bo ta soltero, bo tin mas espacio pa e cosnan creativo. E ta agrega: “bo por tin creatividad y tambe ta den un relacion? … Si, pero pa un persona di un estilo di bida normal. e ta bira dificil pa nan por balansa esaki”.
