Anne Hathaway, Meryl Streep, Emily Blunt y otro miembronan di e elenco di ‘The Devil Wears Prada’ a reuni virtualmente pa revela ken tabata e berdadero diabel di e historia. Ya a pasa 15 aña desde cu e pelicula a estrena riba pantaya grandi. Pa celebra esaki parti di e elenco, Anne Hathaway, Meryl Streep, Emily Blunt, Stanley Tucci y Adrian Grenier, entre otro, a reuni pa recorda algun anectoda cu nan a biba durante e filmacion di e pelicula memorabel.
E combersacion convoca pa e revista Entertainment Weekly tabatin como punto di debate, ta ken tabata e diabel principal di e historia, cual titulo Miranda Priestly (Meryl Streep)a haya, e editora arogante di un prestigioso revista di moda, cu ta abusa di su asistente Andy Sachs (Anne Hathaway). Sinembargo loke a sorprende e fanaticada tabata, cu e actornan a coincidi cu ta Nate, e personahe cu Adrian Grenier a interpreta, ta e berdadero mal hende di e film, dus e guy di Andy, chef di profesion, cu ta separa pasobra e ta prefera di scoge pa su futuro profesional y no pa su relacion.
“Nate no a crece, pero Andy sí”, Grenier a señala. E actor a apunta cu e inicio tabata difícil ora a bin haya sa cu e personahe ta esun malo di e historia, pero cu añanan a logra reconoce e situacion dificil cu el a pone su chick den ficcion. “Ora tur esaki a sali pa prome biaha, mi no por a compronde. Kisas tabata pasobra mi no tabata un homber madura, mescos cu Nate tambe”, el a splica. Despues di tuma un tempo pa reflexiona y delibera via Internet, Adrian Grenier a nota cu “[Andy] tabatin mester mas bida y el a logra esaki. E no por a apoy’e manera e tabatin mester, pasobra e tabata un guy fragil y herida”, el a bisa.
Anne Hathaway di su parti a sigura cu e ta compronde e reaccion di e personahe di Nate. E actriz a bisa cu apesar di su falta di madurez, tabata necesario pa sa di unda e sensacion aki ta bin: “Mi no ta kere cu full mundo ta completamente honesto cu su mes riba su propio mal beis”. Nate tabatin mal beis riba dia di su cumpleaño pasobra su chick no tabata t’ey. Pa e interprete, e chef por a tuma un decision diferente, pero ‘ken no lo hacie? Nos tur tabata falta di madurez den diferente momento. Nos tur mester biba, laga biba y hacie miho, el a termina bisando.
