Melvin Glorinda Wyatt-Ras, Mervin, a crece den un famia humilde Ras-Bareño di 3 yiu den e barionan di Noord Cura Cabai, Brazil y Savaneta. Mervin ta un orthopedagogo, terapista di Hypnosis Rational y Terapista di Famia y di Sistema. El a traha durante 12 aña na Departamento pa Asuntonan Social, seccion Dificultad di Bida y Famia, atendiendo e muchanan y guiando e famianan cu problemanan psycho-social y agresividad.
Tambe el a duna les na diferente profesional den ramo di educacion. Ademas e ta boluntario den su bario y den area cultural. Mervin tabata parlamentario (2001-2021), e prome Presidente di Parlamento Femenino (2005-2009 y di 2016-2017) y Parlamentario Independiente (2010-2013).
Mervin a traha riba diferente ley di iniciativa, cualnan a ser aproba unanimamente den Parlamento: cambio di Codigo Penal pa e castigonan mas halto pa abuso sexual di menor y hende muhe, e Ley di Stalking, e Ley pa hisa e Verlof di Embaraso y Parto cu e oportunidad pa e mama por duna pecho of kolf na trabou y Ley di Ombudsman, hunto cu otro coleganan.
Mervin a mustra su integridad na momento cu el a vota pa e Ley di Austeridad of “Versoberingswet” na december 2010. Mervin sin mira su propio interes a para pa igualdad y vota pa kita diferente pensioen y acumulacion di “toelagen” di politico cu otronan den nos comunidad no ta gosa di dje. Partido MEP a rabia y a saca Mervin for di nan seno. Despues cu el a keda independiente den Parlamento pa mas cu 2 aña Mervin a continua su carera politico den partido AVP, aumentando su votonan.
Firme, honesto y cu amplio experiencia
E puntonan di enfoke di Mervin Wyatt-Ras ta e.o, pa crea trankilidad den nos comunidad y duna sosten y ayudo na esnan cu a perde nan entrada y ta biba den pobresa. Rescata Aruba su economia door di renegosha e medidanan cu e gobierno saliente a bay di acuerdo cu nan cu Hulanda y a firma pa medio di un Landspakket y 2 Ley di Reino, cualnan ta COHO y Raft. Den dialogo cu comercio kita e “red tape” cu tin actualmente y crea mas oportundad pa trabou pa asina e famianan por pone pan riba nan mesa. Garantisa Husticia Social pa un y tur, y no pa “friends and family”, cu atencion special pa esnan vulnerabel den nos comunidad, manera e hobennan, nos grandinan, pensionadonan, mayornan soltero, esnan cu limitacion y esnan di edad di 50+.
Duna sosten na e famianan pa e viviendanan keda pagabel. Fortifica ayudo psycho-social y sostene famianan y mayornan den e tarea di educacion, hunto cu implementacion di Trai Media pa hoben y e Ley Kinderopvang. Stimula agricultura, cria y pesca pa garantisa empleo y propio consumo.
Garantisa leynan adecuado, acohida, guia y prevencion den caso di abuso di menor y violencia (domestico).
Promove cuido cualitativo di nos salud, den cual derecho di e pashent ta central cu atencion pa baha e lista di espera, prevencion y promocion di bida saludable. Sostene maestronan y docentenan pa nan por continua cu e reto di educa nos hobennan cu medionan digital.
Stimula cohesion social den nos barionan, di e forma cu nos ciudadanonan por yuda otro tambe den e situacion actual. Sostene frontliners y cuerpo policial pa garantisa seguridad den nos pais y stimula prevencion di criminalidad. Diversificacion di nos economia y turismo cu atencion pa e-commerce y turismo medico pa haya mas ingreso pa nos país. Den dialogo stimula desaroyo innovativo y cambio di mentalidad pa loke ta trata proteccion di nos naturalesa y uzo di energia alternativo e.o. pa baha costo di awa y corriente. Vigila y conserva integridad den gobernacion.
