Kate Hudson, un social media influencer y blogger di Ohio, y su fiancé Chance Moore, a documenta e bataya di nan yiu muhe, Eliza, cu un cancer poco comun riba un pagina di TikTok popular. Dialuna e mama a revela riba Instagram cu su yiu, Eliza Adalynn, di 2 aña y mey, a muri diadomingo riba Dia di Tata. E pareha a duna bonbini na nan baby na augustus 2018, y el a wordo diagnostica cu un cancer hopi straño y agresivo conoci como ‘rhabdoid tumor’, ora e tabatin 10 luna di edad, segun un pagina di GoFundMe.
Hudson a skirbi riba su Instagram, cu e no sa con nan lo sigui sin nan sweet baby. E sa cu nan a haci e promesa cu nan lo ta balente, mescos cu nan yiu, pero nan ta destrosa. “Aunke nos sa cu ya bo no ta sufriendo of ta den dolor of frustra cu loke bida lo a converti. Mi a pensa cu paso nos tabata sa cu bo tabata muriendo, bo morto no lo sinti asina repentino. Pero el a sinti. Mi no tabata prepara pa mira loke mi a pasa aden”.
Den un post riba Instagram diabierna, Hudson a bira emocional mientras e tabata aclarea e rumornan riba internet tocante su yiu, ya cu algun hende riba e rednan social a plama e rumor eroneamente cu Eliza a muri. El a critica esunnan cu a core e rumornan ey, mientras el a gradici e fanaticonan cu a ofrece un apoyo genuino den e ultimo dianan di su yiu muhe. “Mi kier kere cu mi ta spierta di e nachtmerrie aki y bo t’ey cu nos mannan teni. Bisando cu e tabata solamente un mal soño”, e mama afligi a conclui.
