Diaranson e influencer mexicano, Odalis Santo Mena, cu tabata practica bodybuilding, a bay haci un tratamento contra sodamento excesivo cu un final fatal. E famia y siguidonan di Odalis ta sclama pa husticia pa e morto di e influencer, paso nan ta conclui cu su morto ta door di negligencia medico na Skin Piel Clinic Wellness Center, unda el a bay pa realisa un tratamento cu ta yama ‘Mira Dry’.
Odalis Santos a haci un campaña publicitario di e centro riba su Instagram, unda e tin mas di 91 mil seguido, hopi di nan cu awo ta hisa nan stem pa exigi husticia na e autoridadnan di Jalisco na Mexico, pa e deportista cu a motiva nan pa un estilo di bida mas saludabel. E empresa Skin Piel a contrata e deportista door di su popularidad pa realisa e tratamento cosmetico, cual a costa su bida. Sinembargo, e version ta zona cu e tratamento a wordo realisa pa un personal cu no ta apto y no pa e dokternan specialisa.
Como parti di e acuerdo publicitario, Odalis a publica den su post e proceso cu e lo wordo someti na e clinica di estetica, den cual por mira den su videonan con un empleada di e empresa ta splica e tratamento na e deportista. E empleada a sigura cu e lo wordo haci di un forma sigur y simpel. Y awo su siguidonan a denuncia cu e hoben a bira victima di un personal no capacita.
Por a lesa con nan a publica sin censura cu e hoben entrepreneur, deportista y yen di soño a muri pa negligencia di un clinica, unda el a wordo someti na un tratamento pa reduci sodamento na su cocodek. Odalis tabata un studiante di e prome semester di Nutricion na Centro Universitario di Costa Sur di e Universidad di Guadalajara. Recientemente el a obtene e prome luga den e competencia Youth Wellness Fitness den Ms. Juventud y Veteranos di Jalisco 2021.
