Anoushca ‘Noush’ Jeandor ta bin di un cuna musical, su tata ta e musico conoci Robert Jeandor. Na un edad hoben el a cuminsa canta den koor y asina sigui desaroya su mes den area di musica. Despues di esaki el a ricibi e oportunidad pa canta den casino. Cu su mesun banda ‘Perfect Sound’ lansa na 2006, Noush sa presenta na diferente luga y evento. Algun aña pasa, el a ser corona como Aruba su prome ganador femenino general di Tumba Festival.
“Dancing in the sun, on the rhythm of the drums. Bailando al ritmo de la vida, que esta fiesta no termina” – cu e mensahe positivo aki Noush ta habri su produccion pegahoso nobo titula ‘Al Ritmo de la Vida’. Bao di encargo un biaha mas di Alex Odor, e produccion aki segun e cantante ta algo “diferente y yena cu ambiente – manera tur hende ta custuma di mi”. Despues di a wordo conseha door di un fiel fanatico di su musica pa produci algo cu ta trece ‘ambiente’ – Al Ritmo de la Vida – a nace.
“Sinta den studio cu Alex, nos tabata scucha algun produccion. Manera cu el a laga mi scucha esaki, el a val mi op mesora. Mi a bis’e cu nos ta bay yam’e ‘Al Ritmo de la Vida’”, asina NOUSH a splica. Inspira pa temporada di zomer, futbol y sabor tropical, ‘Al Ritmo de la Vida’ ta yena cu e tononan melodioso, letranan positivo y ritmo pegahoso cu por scucha den e subgenero di “Tropical Dance Pop”. Cu e idea aki den mente, NOUSH y su team di produccion Skillmatica a filma un videoclip vibrante, energetico y inspirativo.
Un danki ta bay na tur esnan cu a contribui cu e proyecto aki. Danki na Alex Odor y Alano Music pa e produccion, Debra Boekhoudt y su grupo di baile Youth in Action, Shaindra Ashby / Malbin Gomez y Shaquille Buckley pa e coreografia, make-up artist Edgar Kock, hairstylist Lieshandra Farro, Enry Thiel pa su ekiponan di luz, House of Mosaïc pa e bunita locacion y SkillMatica pa e grabacion di e videoclip. Tambe nan kier a yama danki na Kicksart Cultuurfonds cu ta wordo haci posibel door di Prins Bernhard Cultuurfonds Nederland, BankGiro Loterij, VSBFonds, VandenEnde Foundation y Prins Bernhard Cultuurfonds Caribisch Gebied (PBCCG).
Facebook: https://www.facebook.com/noushmusic
Instagram: https://www.instagram.com/noushmusic/
YouTube: https://www.youtube.com/channel/UCxNj1CXhTCxKRZL3ulNVQ1w
Song Link: https://www.youtube.com/watch?v=Z1SLll2POow&ab_channel=Noush
