E relacion di Gigi Hadid y Zayn Malik a yega na su fin despues di un aña di nacemento di nan yiu Khai. E noticia a wordo revela memey di un cantidad di acusacion entre e cantante y su suegra, Yolanda, cu ta sigura cu Zayn a dal e durante un discusion na e cas di e pareha. Gigi Hadid a publica un comentario cortico, unda el a skirbi cu e no lo participa den niun tipo di combersacion publico tocante di e asunto aki, mientras su representante a bisa: “Gigi ta unicamente enfoca den loke ta miho pa su yiu Khai y ta pidi pa privacidad den e momentonan aki”.
Gigi, Yolanda y Bella hunto cu Khai, celebrando su prome cumpleaño. Bella a post e potretnan dia 6 di october, un siman despues di e incidente y Zayn no tabata riba e potretnan,
E publicista di e cantante a nenga Yolanda su testimonio y el a pidi pa e no sigui plama mentira di e asuntonan intimo di e famia. “Mi ta nenga cu mi a dal Yolanda y pa consideracion cu mi yiu muhe, mi no lo haci mas comentario. Mi ta spera cu Yolanda lo reconsidera su argumento falso y opta pa mira dilanti pa nos cura e heridanan di famia den priva”, esaki ta e mensahe cu e vocalista britanico a duna a traves di su agente di prensa.
Zayn Malik a bay un rato despues riba su cuenta di Twitter pa e comparti den un post su deseo di proteha su yiu di e controversia aki, cu tambe ta toca e tema sensibel cu ta violencia contra hende muhe. El a comparti su mensahe cu esaki ta un situacion priva y e mester wordo mantene asina. Pero pa e momento aki ta mustra cu division ta reina, a pesar di su esfuerso pa restaura e paz den su ambiente familiar, pa nan dos por cria nan yiu manera e merece. Pero tur cos ta mustra cu tin un leakmento di informacion pa e media, cu ta sospecha ta door di Yolanda, ken na otro ocasion tambe a informa prensa di asuntonan priva.
E incidente a pasa dia 29 di september na e cas di Gigi y Zayn cerca de New Hope, Pennsylvania. E cas riba e potret ta mustra asina prome cu e pareha a cumpre na 2020.
Segun informacion cu a wordo publica cu dia 29 di september, Yolanda a bay na e propiedad di e pareha mientras Gigi tabata modelando na Paris. Zayn tabata eynan, aunke no ta mucho cla si Khai tabata eynan tambe. Loke a pasa tampoco no ta mucho cla, pero nan dos a cuminsa discuti y Zyan a gara Yolanda y pushe riba un commode. Zayn Malik a declara inocente di cuater cargo di harassment despues cu supuestamente el a pusha e mama di su pareha, Yolanda Hadid, y yame pa ‘f*****g Dutch sl*t’, na e cas cu e ta comparti cu Gigi Hadid na Pennsylvania.
