Desde augustus 2013, Darlene Engelbrecht-Falconi, ta trahando na EPB San Nicolas como docente den Sector Economie. El a studia y biba na Hulanda durante 9 aña, unda el a termina ‘Hogeschool Rotterdam’ y a obtene su ‘Bachelors in Education Business Economics’. Su siguiente estudio tabata den ‘Fashion & Design’ na Artemis Mode Academie. Na final di aña 2012, Darlene a bolbe Aruba y el a casa cu Rick Engelbrecht na 2018, y ta mama di un bunita yiu muhe Aleya-Rose.
Pa ta un hende muhe independiente y nunca rindi, ta un enseñansa cu Darlene a ricibi di su mama, cual sigur e kier pasa pa su yiu muhe. E lo promove igualdad door di cuminsa na cas, unda ambos ta yuda otro. Tambe pa e cultura na trabou ta mescos pa e homber y muhe, cu mesun salario y posicion pa ambos. Awendia nos hende muhenan ta mesun ‘lider’ cu e hende hombernan, cual ta duna Darlene un alegria inmenso. Y por ultimo uno hopi importante p’e ta, cu nos hende muhenan no ta tolera niun forma di ‘harassment’ y ta vocifera nan mes si esaki pasa cu nan.
Den edicion di Focus Digital Magazine di maart, Darlene ta splica di e retonan di e hende muhe den e sociedad awendia. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
