Hopi persona tin e pensamento, cu ora bo ta drumi hopi, bo ta perde tempo, cu bo por inverti den cualkier actividad, cu por resulta den exito of productividad. E importancia di un bon soño anochi y drumimento regularmente no tin solamente beneficio di salud, sino tambe cu drumimento por y ta contribui na exito den diferente forma. Y esaki ta netamente loke e personanan exitoso, manera; Jennifer Lopez, Warren Buffet, Bill Gates, Ariana Huffington, Jeff Bezos, Ellen Degeneres y tambe The Dalai Lama ta bisa, cu: “drumimento ta e miho forma di meditacion”.
Idealmente un persona adulto mester por drumi por lo menos 7 pa 8 ora cada dia. Ora un persona drumi entre 8 pa 9 ora cada dia, esaki ta contribui na lanta cu un mente calmo y relaha, cu por dura henter dia.
Salud y Nutricion
Pone bo mes na prueba y cuminsa drumi por lo menos 2 siman tur anochi, 8 pa 9 ora cada dia. Haciendo esaki, bo lo nota cu pocopoco bo salud y forma di nutricion tambe lo cuminsa mehora. Drumimento no ta solamente yuda reduci nivel di stress, pero tambe ta reduci e riesgo di e malesanan cronico, manera; presion halto, mantene sistema inmunologico den balans y ta yuda retene memoria. Banda di esaki, drumimento por yuda maneha apetito. Hopi biaha ora nos ta drumi laat, nos celebro ta cuminsa pidi cuminda cu sucu, como cu e celebro ta saca un kimico cu ta señala hamber. Hopi persona ta subi facilmente di peso, simplemente pasobra nan ta drumi laat y mucho poco ora. Tambe e factor di stress ta evita, cu un persona por drumi of pega soño y asina ta keda lanta pa hopi ora largo.
No ta un secreto cu unabes bo curpa ta custumbra na haya e cantidad di ora di descanso cu e ta rekeri, bo gana di come hopi sucu of consumi cafeina tambe ta baha. Esaki ta bin como cu e curpa ta descansa y no tin e necesidad pa haya consumi e productonan, pa tene e mente y curpa lanta.
Creatividad y Productividad
Unabes cu e mente ta descansa e partinan celebral, cu ta contribui na creatividad, ta bira mas activo. E idea- y solucionnan, cu kisas no tabata existi, ta bira cla y posibel despues di un bon soño. Esaki tambe ta e yabi di exito di hopi musico y CEOs cu diariamente ta depende riba nan propio idea y creatividad, pa asina cosecha exito den nan funcion.
Aparte di esaki:
• Ta yuda preveni stress y ‘burnouts’
• Mehora concentracion y retene memoria of informacion
• Habilidad pa focus miho, incluyendo e habilidad pa tuma miho decision
Tips pa un Miho Soño
Drumimento no ta bin facil pa algun persona, specialmente p’esunnan cu ta sufri di ‘sleep deprivation’ of insomnia. Naturalmente e prome paso ta, pa comparti esaki cu bo dokter di cas, pa asina hunto mira con por yuda combati esaki. No tur ora ta necesario pa uza pilder of medicamento sintetico, pa por pega soño anochi. Algun forma y metodo cu por yuda bo haya un miho calidad di soño anochi por inclui:
• Reduci bo screen time por lo menos 2 ora prome cu bo orario regular di drumi.
Esaki ta nifica cero uzo di celular, television, i-Pad of cualkier obheto electronico. A cambio di esaki, uza e tempo pa lesa un buki, revista of kisas tuma un tempo pa relaha y comparti bo dia cu bo pareha.
• Evita consumo di alcohol of cafeina despues di 2:00 pm
E kimico adenosine cu e celebro ta produci, ta loke ta contribui na e sentimento di drumi y cansancio. Cafeina y alcohol ta haci net lo contrario door di blokia e receptornan den e celebro. Como cu cafeina ta keda den bo sistema pa 5-7 ora, ta necesario pa evita di consumi esaki pa asina e curpa por experencia sentimento natural di cansancio y drumimento por tuma lugar mas facil.
• Crea un rutina diario pa drumimento
Un rutina pa drumi ta inclui mucho mas cu drumi diariamente na un orario fiho. Tambe esaki ta rekeri haci e cosnan cu kisas ta laga bo sinti mas relaha posibel. Por ehempel un baño di awa friu, bela cu aroma terapeutico, cusinchi y un cama comodo y por ultimo un te herbal manera; chamomile, lavender, valerian, lemon balm of magnolia.
Nos ta bibando den un epoca cu tur cos ta basa riba productividad, exito, perfeccionismo y un cultura cu ta enfoca riba drumi menos y traha mas. Ta importante pa nos realisa cu mesun importancia cu nos ta duna pa recarga nos celular diariamente, nos mester por recarga nos mes door di drumi mas y descansa. Nos curpa ta e vehiculo cu ta yuda nos crea y realisa cualkier cos y esaki por ta solamente posibel, si nos ta dun’e e descanso cu e ta rekeri. Cuanto biaha bo a recarga bo mes awe?
