Francia Márquez a converti dia 19 di juni den e Vice Presidente electo di Colombia, cu su triunfo den e eleccion hunto cu Gustavo Petro den e segundo buelta di e eleccion presidencial di e pais. E ascenso di Francia Márquez den politica a cuminsa cu e resultado electoral den e consulta di e coalicion di izquierda na Colombia cu tabata historico.
Francia Márquez di 40 aña, cu nace den e region di Cauca, a crece durmiendo riba vloer di tera mientras e tabata enfrenta violencia di genero y un pobresa inmenso. Segun su propio descripcion, cu e ta e prome muhe: “negra, afrodescendiente, oriunda de las regiones más empobrecidas de Colombia”, cu a saca un votacion historico dia 13 di maart. El a obtene mas di 783.000 voto den e consulta di e Pacto Histórico (14%). El a participa den representacion di e partido Polo Democrático Alternativo. El a keda segundo despues di Gustavo Petro, ken despues a yame pa e ta su formula vice presidencial.
A pesar cu e victoria di Petro tabata contundente, e votonan di Francia Márquez a supera e expectativanan di e expertonan. El a haya un apoyo grandi di Camilo Romero, cu tabata senador y gobernador di e departamento di Nariño, y conoci pa ta un persona cu vision. Francia Márquez a recore gran parti di e pais cu un campaña cu segun el a bisa pa ‘dignificar’ e politica y haci visibel ‘los nadie’, e muhenan cu a ser utiliza cu violencia y e victimanan di e violencianan na e pais.
