Priscilla a biaha rond mundo como modelo profesional y el a traha cu varios marca mundialmente conoci. E ta recorda tempo cu e tabatin solamente 18 aña yegando Hulanda pa biba. E tabata prome bes cu el a biaha pa un otro pais y cu asina hopi soño yegando ey. Awendia e ta comparti cu hopi orguyo, cu mas cu mitar di nan el a cumpli caba.
E tabata riba portada di e revistanan di moda, y sigur pa FOCUS e tabata un honor pa Priscilla ilustra e portada di 20 aniversario na april 2015. E tabata den short films, propagandanan di television, y el a traha cu varios cas di moda y fotografonan famoso. El a siña conoce hopi diferente cultura y paisnan rond di mundo, p’esey e lo ta pa semper agradecido.
Despues di 12 aña di ta un modelo profesional, Priscilla a dicidi di dedica su carera patras di e lens, como un freelance ‘Fashion Creative’ cu su base na Amsterdam. Pa Priscilla bibando na un otro pais no ta facil, principalmente si tin un diferencia grandi di cultura. E ta bisa cu el a siña pa forma un cuero diki y semper scoge p’e mes.
Den Focus Digital Magazine pa e luna di october, Priscilla ta mustra su cas cu e ta comparti hunto cu su pareha. Como un duo creativo nan cas su diseño interior ta hopi apart y via Instagram por sigui tur e detayenan con nan ta renobando esaki. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
