E rason principal cu Endy Croes y Carl Quant a muda pa Hulanda ta pa habri nan mes pa mas oportunidad- y aventuranan nobo. Nan ta encanta biaha y for di Hulanda e ta hopi mas economico pa biaha, principalmente den Europa mes. Sinembargo, ambos a expresa e gana pa biba den exterior for di principio di nan relacion.
Durante pandemia cu nan a mira con hopi hende a perde nan trabou, hogar, familiar of hasta nan propio bida, esaki tabata manera un ‘wake-up call’. Nan a reflexiona bisando cu bida ta cortico y nan tin metanan cu nan kier alcansa, pensando mas den futuro, aunke e futuro tampoco no ta un garantia pa niun hene.
Nan a pensa riba muda pa paisnan mas grandi, unda cu por alcansa mas meta manera por ehempel Merca of Canada, pero e stap tabata mas facil pa muda pa Hulanda cu nan paspoort.
E obstaculonan cu nan a confronta mudando pa exterior tabata miedo di e insiguridadnan cu nan lo enfrenta, pasobra nan bida na Aruba tabata asina facil, y muda pa Hulanda tabata mustra asina eng.
Sinembargo unabes cu a tuma e prome paso a ripara cu e siguiente paso ta bira algo natural y e siguiente tambe. Pero djis e prome paso ta keda esun di mas dificil. Endy y Carlo mester a informa famia y tambe na nan trabou di nan desicion pa asina e proceso por cuminsa cana. Nan mester a djis surpasa e miedo di loke nan no ta sigur di dje ainda na Hulanda.
Endy y Carlo den nan entrevista den Focus Digital Magazine di e luna di october ta comparti con nan bida ta na Hulanda y ki ta nan plannan pa futuro. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
