Durante e ultimo dianan hopi a ser publica y comenta tocante e grandioso evento anual di Kiwanis Club of Aruba pa recaudacion di fondo, cu ta tuma luga diabierna awo 18 di november. Un evento diseña cu tur e detayenan special segun e tema pa asina crea un experiencia magico. E tema escogi e aña aki, Cirque du Soleil, a haci un impacto sigur mirando e exito den e benta rapido di e seccion VIP y benta di ticket en general.
Entre tur loke ta bay haci Cirque du Soleil un anochi espectacular tin cu resalta e parti creativo cu ta den man di Egmar Irausquin, cu ta e Creative Director na Elite Productions & Entertainment. E ta encarga cu full e departmento di Design y Video, cu cerca nan yama Creatives. Egmar ta diseña Stage, Decor, Photobooth, Event Setup, Video y tur cos cu ta cay den graphic design y ta haci video mapping.
Video mapping ta un proceso largo, unda e mester tuma midi y saca potret di e superficie prome cu por cuminsa diseña. Si mester haci un video mapping den 3D, esaki lo tuma hopi mas ora y dia di preparacion. Egmar ta splica cu e parti mas largo semper ta loke nan ta yama render. Unabes cu un ‘animation’ ta cla, e proceso pa haci esaki den un video por tuma hopi ora dependiendo di e complehidad cu a traha aden. Hopi biaha nan ekipo ta purba gana tempo door di uza 2 of 3 computer pareu pa haci e proceso di rendering mas lihe.
Egmar a cuminsa den e mundo di Graphic Design, Video Animations y Design desde 2008. Tempo cu el a cuminsa su estudio na Academie Voor Popcultuur na Hulanda. Un opleiding dedica na diseño, musica y entretenimento. E tempo ey, e prome den su sorto, diferenciando di e academianan di arte existente. Desde cu el a cuminsa studia, hopi lihe caba el a drenta den e arte di video y a cuminsa Vj den club. Egmar ta splica cu VJ ta video jockey, pues e persona cu ta mix video den un club, cual na Aruba no ta wak hopi. El a keda siña y innova den e mundo di VJ te cu el a cuminsa crea video mapping, cual el a haci na diferente ciudad na Hulanda. Un experiencia unico p’e ta e video mapping cu el a yega di haci un biaha na Qatar pa un film festival.
Egmar a bolbe Aruba na 2016 y el a cuminsa traha na Elite Productions & Entertainment. Nan a yega di haci diferente mapping cu tabatin su importancia, y por menciona esun mas recien ora KLM a introduci nan Huisje 103. Aki nan a proyecta riba e cas berde cu tin na Museo Arqueologico Nacional Aruba. Nan ta haci video mapping mas cu un bes pa luna na diferente hotel na Aruba, unda e hotelnan ta haci uzo di e producto aki regularmente pa nan guests, manera na The Ritz-Carlton Aruba y Hilton Aruba Caribbean Resort. Pa e fiesta anual pa recaudacion di fondo di Kiwanis Club of Aruba, ya esaki ta bay bira di tercer biaha cu Egmar Irausquin ta haci video mapping den Renaissance Convention Center. Elite Productions & Entertainment ta uza e efecto di video mapping pa transforma e lugar completamente. E biaha aki cu e tema di Cirque du Soleil nan lo bay traha cu imagen acrobatico y lo trece e experiencia magico di Cirque du Soleil den Renaissance Convention Center.
