HERENCIA ta e lansamento di e prome SOLO Collection di MAISON RYON despues di e lansamento na juni 2021. E momento pa fortifica kico MAISON RYON su identidad ta como marca a yega despues di 15 luna E ta un coleccion inspira riba infancia di su creador, RYON, cu tabata gusta explora, lesa buki y conoce mas di e sitionan historico. Su interes a permanece y su curiosidad a laga su mente sigui desaroya cu tempo pa sa mes di nos ‘raiz’, cual cu p’e ta simbolisa HERENCIA.
HERENCIA ta un coleccion basa riba historia Arubano di e pictographs y petroglyphs (pinturanan) laga atras door di e Amerindionan na e sitionan arkeologico na Aruba manera: Cunucu Arikok, Fontein y Paraguana. Cu un respet inmenso, e idea aki a nace for di e pinturanan aki, crea siglonan pasa door di e prome hendenan cu a pisa nos suela, e mesun suela cu nos ta yama cas. Esaki ta e simbolonan di nos identidad, transforma den e piesanan di joyanan unico, simbolico cu un ‘plethora’ di emocion. E piesanan aki ta destina pa ta un recordatorio di e echonan di nos pasado, di nos mesun historia y di esun di nos Cas, Aruba.
E parti mas fascinante den e proceso creativo tabata e parti di desaroya e joyanan cu e joyeronan, uzando e tecnica di ‘lost wax casting’, sintando diferente biaha hunto den e atelier pa asina yega na un tamaño na e vision di RYON. Den edicion di Focus Digital Magazine di november, Ryon Dijkhoff ta elabora riba henter e proceso pa realisacion di un coleccion cual ta ‘sofisticacion autentico’.
